Կրակոց Նախիջևանի ուղղությամբ. Կործանիչները Հայաստանում կլինեն մինչև 2020թ. սկիզբը

Նախիջևանի հատվածում հուլիսի 17-ին հայ դիրքապահների ուղղությամբ արձակված կրակոցից հետո օպերատիվ կապ է հաստատվել ադրբեջանական կողմի հետ, այսօր լրագրողներին տեղեկացրեց Պաշտպանության նախարար Դավիթ Տոնոյանը
Սահմանային որոշ հատվածներում, նախարարի գնահատմամբ, առկա է վերահսկելի լարվածություն, պատճառը ինժեներական աշխատանքներ են․ - «Կրակոցը եղել է ոչ նպատակային, ոչ թիրախավորող: Ամեն դեպքում մենք միջոցներ ենք ձեռնարկել, նաև կապ է հաստատված հարևանի հետ, որպեսզի չկրկնվեն էդ դեպքերը»:

Տոնոյանը հավելել է, որ օգտագործվել է 2018թ. սեպտեմբերին Դուշանբեում Նիկոլ Փաշինյանի և Իլհամ Ալիևի միջև պայմանավորվածության արդյունքում ստեղծված օպերատիվ կապը․ - «Միջնորդավորված կապ է սա, բայց խոսում ենք ոչ անմիջապես, խոսում ենք նշանակված պաշտոնյաների միջոցով: Նորմալ գործընթաց է սա, շատ դրական գործընթաց է»:

Նա նաև ռազմական անակնկալներ է խոստացել բանակի սպառազինության մասով: Բացի այդ, Տոնոյանը հստակեցրել է, որ ռուսաստանյան արտադրության ՍՈՒ-30 բազմաֆունկցիոնալ կործանիչները Հայաստանում կլինեն մինչև 2020 թվականի սկիզբը:

Նախ, սկսենք նրանից, որ Հայաստանի պաշտպանության նախարարի մակարդակով արձանագրվել է, որ սահմանային լարվածություն, այնուամենայնիվ գոյություն ունի:
Ավելին՝ ՀՀ պաշտպանության նախարարն արձանագրում է, որ ինժեներական աշխատանքներ են իրականացվում, այն ինչի մասին ասում էին դեռ անցյալ տարվանից, իսկ իշխանության ներկայացուցիչները նման մտահոգություններ ներկայացնողներին անվանում էին դավաճաններ:

Հիմա՝ ի՞նչ, փաստորեն, լարվածություն կա այն պայմաններում, որ գոյություն ունի Փաշինյան-Ալիև օպերատիվ կապի պայմաններում, ու այս ամենի հետ միասին՝ նշվում է, որ ադրբեջանական կողմը ինժեներական աշխատանքներ է շարունակում իրականացնել:
Կարող ենք, ուրեմն, արձանագրել, որ ՀՀ պաշտպանության նախարարի մակարդակով արձանագրվում է, որ ադրբեջանական կողմը պատրաստվում է հնարավոր պատերազմի ամենայն լրջությամբ:

Մնում է հասկանալ, թե ինչու՞ մենք այդքան հանդարտ այդ ամենին նայում ու սպասում...

Թամար Բագրատունի