«Թշնամի» ներկայացնելու՝ Փաշինյանի թիմի մոլուցքը հասավ ԱՄՆ

Հուլիսի 18-ին Վաշինգտոնում կայանալիք «Կրոնի ազատության նախարարական համաժողովին» մասնակցելու նպատակով Հայաստանի ԱԳ նախարար Զոհրաբ Մնացականյանն աշխատանքային այցով կմեկնի ԱՄՆ։ Արտգործնախարարության լրատվության և հանրային դիվանագիտության վարչության փոխանցմամբ՝ Մնացականյանը համաժողովին հանդես կգա ելույթով:

Օրերս ԱԺ նախագահն ու խմբակցությունների ներկայացուցիչները մեկնեցին Ամերիկայի Միացյալ Նահանգներ: ՀՀ ԱԺ նախագահ Արարատ Միրզոյանը, ԱԺ Հայաստան-ԱՄՆ բարեկամական խմբի ղեկավար, «Իմ քայլը» խմբակցության ղեկավար Լիլիթ Մակունցը, «Լուսավոր Հայաստան» խմբակցության ղեկավար Էդմոն Մարուքյանը, ԱԺ «Բարգավաճ Հայաստան» խմբակցության քարտուղար Արման Աբովյանը և ԱԺ պետական-իրավական հարցերի մշտական հանձնաժողովի նախագահի տեղակալ Աննա Կարապետյանը աշխատանքային այցով կմեկնեն ԱՄՆ: Այս մասին տեղեկանում ենք ԱԺ պաշտոնական կայքից:

Այցի շրջանակում պատվիրակության անդամները հուլիսի 14-18-ը կլինեն Վաշինգտոնում, հուլիսի 19-21-ը՝ Բոստոնում, իսկ՝ 25-26-ը՝ Նյու Յորքում: Նրանք ԱՄՆ-ում կլինեն 12 օր: Թե կոնկրետ ինչ հանդիպումներ են նախատեսված՝ պաշտոնական հաղորդագրության մեջ մանրամասներ չեն ներկայացվում:

Մերձիշխանական մամուլն էլ այսօր սարսափած տեղեկացրել է, որ իշխանական «հակազդող այցով» Դավիթ Շահնազարյանը ևս մեկնել է ԱՄՆ, և ըստ իրենց «տեղեկությունների»՝ Շահնազարյանի այցը «անմիջականորեն կապ ունի պետական բարձրաստիճան պաշտոնյաների այցերի հետ և նպատակ ունի հակազդելու այդ այցերին, խոչընդոտելու այդ այցերի ընթացքում հնարավոր պայմանավորվածությունների ձեռք բերմանը»:

Թե այդ ինչ ծրագրեր ունեն իշխանությունները Վաշինգտոնում, որ դեռ չիրագործած արդեն իրենք որոշել են, որ իրենց թիմին ընդդիմացողները կարող են խափանել իրենց «հզոր» ծրագրերը, պարզ չէ...

Առհասարակ, Փաշինյանի իշխանությունն ունի՞ բանակցությունների օրակարգ Վաշինգտոնում, կամ՝ այս մեկ տարուց ավելի ժամանակահատվածն ինչի վրա է ծախսվել... Թե՞ ոչինչ չունեն, բայց գիտեն ում մեղադրեն՝ երբ իրենց մոտ ոչինչ չստացվի:
Միթե՞ այդքան խղճուկ է այս իշխանությունը, որ կարծում է, որ ընդդիմադիրները կարող են խափանել պետական իշխանության ծրագրերը:

Կամ՝ առհասարակ՝ որտեղի՞ց նման ստահոդ «տեղեկություններ» նրանց, թե ընդդիմադիրները դրսում իրենց դեմ են աշխատում...

Հակառակ թիմին թշնամի ներկայացնելու մոլուցքն արդեն անցել է բոլոր սահմանները Փաշինյանի ձևավորած քաղաքական մթնոլորտում:

Թամար Բագրատունի