Ադրբեջանի և Թուրքիայի պաշտպանության նախարարները՝ Հայաստանի սահմանում

20:04 - 16/հունիսի/2019

Դիտել նաև Նրանց չի հետաքրքրում գործնական խաղաղությունը, այլ միայն խաղաղության հակառակ կողմը Հայտնի է՝ ովքեր են Ադրբեջան մեկնած ՀՀ պատվիրակները Հայաստանի քաղհասարակության ներկայացուցիչները կրկին Ադրբեջան են մեկնել ցամաքային սահմանով Թշնամին ոգևորվել է․ Ադրբեջանը կարող է զգալի օգուտներ ստանալ

Ադրբեջանական Գաբալա քաղաքում այսօր հանդիպել են Ադրբեջանի, Թուրքիայի ու Վրաստանի պաշտպանության նախարարներ Զաքիր Հասանովը, Հուլուսի Աքարն ու Լևան Իզորիան: Հանդիպմանը Վրաստանին առաջարկ է արվել մասնակցել պարբերաբար անցկացվող թուրք-ադրբեջանական զորավարժություններին:

«Թրենդ» գործակալության փոխանցմամբ՝ Ադրբեջանի ՊՆ նախարար Հասանովն ասել է, որ տարեցտարի թուրք-ադրբեջանական զորավարժությունների քանակն ավելանում է, եթե 2018-ին յոթ զորավարժություն էր անցկացվել, ապա 2019-ին 13 զորավարժություն է պլանավորված:

Թուրքիայի ՊՆ նախարար Հուլուսի Աքարն ասել է, որ երեք երկրների համագործակցությունը հասել է ռազմավարական մակարդակի: Վրաստանի ՊՆ նախարար Լևան Իզորիան նաև երկկողմ հանդիպում է ունեցել թուրք պաշտոնակցի հետ:
Հանդիպման մասին պաշտոնական հաղորդագրությունում նշված է, որ եռակողմ հանդիպմանը քննարկվել են տարածաշրջանային իրավիճակը, ռազմական ոլորտում եռակողմ համագործակցության հեռանկարները, ինչպես նաև տարածաշրջանային ենթակառույցների անվտանգությունը ապահովելու հարցեր:

Իսկ Հայաստանի հետ սահմանին՝ Նախիջևանում հանդիպել են Ադրբեջանի և Թուրքիայի պաշտպանության նախարարները՝ Զաքիր Հասանովը և Թուրքիայի ազգային պաշտպանության նախարար Հուլուսի Աքարը։ Հիշեցնենք, որ այստեղ հունիսի 7-ին մեկնարկել են ադրբեջանա-թուրքական «Անսասան եղբայրություն-2019» զորավարժությունները։

Թուրք գործընկերոջ հետ հանդիպման ժամանակ Հասանովը հայտարարել է, որ Բաքուն կընդլայնի Անկարայի հետ ռազմատեխնիկական համագործակցությունը՝ երկրի ռազմական ուժն ամրապնդելու նպատակով։ Նրա խոսքով՝ Թուրքիայի հետ համագործակցության զարգացումը «տարածաշրջանում կայունություն ապահովելու գլխավոր գործոնն է»։

Իր հերթին, Հուլուսի Աքարը բավարարվածություն է հայտնել երկու երկրների համագործակցությունից և բարձր է գնահատել Նախիջևանում տեղի ունեցած զորավարժությունները։ Կողմերը նաև քննարկել են տարածաշրջանային անվտանգության հետ կապված հարցեր և տարածաշրջանում իրավիճակի զարգացման հնարավոր սցենարները։

Հայաստանի սահմանին Ադրբեջանն ու Թուրքիան վերջին օրերին ցուցադրեցին իրենց «ուժը»՝ համատեղ զորավարժություններ: Ինչ վերաբերվում է Վրաստանին, ապա այդ երկիրը անցյալում էլ մասնակցել է նմանատիպ զորավարժությունների:

Մետաքսյա Շալունց