Ծառուկյանի գրոհը. որ բիզնեսմեններին իշխանությունը չի ստուգում

Տրանսգենդերի հայտնի ելույթից ծագած «Իմ քայլը»-ԲՀԿ բանավեճը մարել է՝ տեղի տալով նոր՝ տնտեսական հակամարտության: Դեռ օրեր առաջ ՊԵԿ-ը քննչական գործողություն սկսեց Գագիկ Ծառուկյանին պատկանող «Առինջ մոլում», հետո այլ ընկերություններում, այսօր հակամարտությունը տեղափոխվել է ցեմենտի ոլորտ:«Արարատցեմենտ» գործարան տանող ճանապարհը երեկվանից փակ է, աշխատակիցները բողոքի ակցիա են իրականացնում եւ պահանջում հանդիպում ԲՀԿ առաջնորդ Գագիկ Ծառուկյանի հետ, որը գործարանի սեփականատերն է:

Ավելի քան հազար աշխատակիցներ ծանուցագրեր են ստացել, որ հունիսի 15-ից ազատվելու են աշխատանքից: Գործարանի տնօրինությունը պարզաբանել է, որ Իրանից ներկրվող հումքի էժան լինելու պատճառով իրենց արտադրանքը մրցակցային չէ։ Օրերս կառավարությունը նախագիծ է ներկայացրել, համաձայն որի՝ պետական տուրքը ավելացվելու է արտերկրից ներմուծվող ցեմենտի դեպքում, սակայն Տնտեսական հանձնաժողովի անդամները առաջարկեցին, որպեսզի ոլորտում մենաշնորհ չլինի եւ հնարավորություն ստեղծվի էժան ցեմենտ մտցնել շուկա, ուրեմն պետտուրքը պետք է հանվի Իրանից ներկրվող ցեմենտի հումքի՝ կլինկերի վրայից, իսկ իրանական կլինկերն անհամեմատ էժան է, և դրա հետևանքով տեղական արտադրողները տուժելու են:

Գագիկ Ծառուկյանն այսօր ԱԺ-ում անդրադարձավ իրեն պատկանող ցեմենտի գործարանում ստեղծված իրավիճակին, ասելով, որ հիմնական պատճառն ԱԺ տնտեսական հարցերի մշտական հանձնաժողովի դիրքորոշումն է: «Քննարկվել էր էկոնոմիկայի նախարարի հետ, որ նայելով պարսկական ցեմենտը, ասենք թե, տեղի արտադրանքը՝ որոշումը ճիշտ կայացվել էր: Մենք էլ դրա համար 50 հազարը սարքել էինք 40 հազար, և ավելի մեծ պահանջարկ կըլնի: Բայց չգտեմ ով ինչ անձնական շահերի շնորհիվ՝ հանձնաժողովը որոշում է կայացրել՝ թող էդքան ընտանիք չաշխատի, այլ կլինկերի վրա, ասենք թե, տուրքը չդրվի: Հենց կլինկերը ցեմենտի ամենակարևոր մասն է, որը հիմնական ծախսերի 90 տոկոսն է: Ասենք եթե, 100 հազար տոննա, որն ինձ զեկուցել են կառավարիչները, ստանալու համար հարկավոր է 3 մլն դոլար գազի գումար վճարել, միլիոնուկես հոսանքի գումար վճարել, 1350 հոգու աշխատավարձ տալ: Իսկ եթե իրենք որոշում են կայացնում կլինկերի վրա տուրք չդնել, իրենց անձնական շահերի, որոշ ծանոթ-բարեկամների խնդիրը լուծել և պրովոկատորներին ուղարկել ցեմենտի գործարան, որ իրանք ընդհանրապես կապ չունեն ցեմենտի գործարանի հետ»,- ասաց Ծառուկյանը։ Ի դեպ, լրագրողների հետ զրույցում ԱԺ խոսնակ Արարատ Միրզոյանը վստահեցրեց, որ իրենք ծանոթ-բարեկամ սկզբունքով չեն առաջադրվում եւ հայտարարությունն այդ մեղմ ասած անհիմն է: Իշխանության դեմ գրոհը շարունակվեց ԱԺ հայտարարությունների ժամին: ԲՀԿ-ական Արթուր Դալլաքյանը հորդորեց՝ Հայաստանում տեղական աշխատատեղերի պահպանման անհրաժեշտություն կա:

«Ի՞նչ ենք պատրաստվում անել: Օգնել իրանցիների՞ն: Մենք ցանկանում ենք մեր մարդկանց հաշվին ապահովել նրանց աշխատատեղերը: Մարդիկ ասում են, որ կորցնում են իրենց աշխատանքը, եւ ոչ ոք այդ մասին չի մտածում», - ասաց պատգամավորը` հավելելով, որ տեղական արտադրողը պետության պաշտպանության եւ աջակցության կարիքն ունի:

Ի դեպ, Ծառուկյանի այսօրվա պահվածքից ակնհայտ էր, որ չի պատրաստվում նահանջել իշխանության քայլերին: Նա դժգոհեց հարկային մարմիններից, ասաց, որ անընդհատ իրեն ստուգում են: «Ինչ որ Անանյանը եկել է պաշտոնի, ոչ թե մի օր, 10 օր, 15 օր, ամբողջ ուղղությունը Ծառուկյանն ա: Ես էլ ասում եմ՝ օրենքի առաջ բոլորը հավասար են, ստուգում է, գնացեք ստուգեք: Ինչքան կուզեք, ստուգեք: Այնտեղից դուրս չեն գալիս, թե ինչ են փնտրում: Ժամանակը գալու ա, ստուգումները կավարտվի, Ծառուկյանը Հայաստանի բոլոր լրագրողներին հավաքելու ա, կետ առ կետ, դոկումենտալ հարց ու պատասխան, որ սաղի համար պարզ լինի և Պետական եկամուտների կոմիտեի մոտեցումը, և ստուգումները, թե ում են ստուգում, ում չեն ստուգում, ինչ են ուզում, ինչ են ստուգել»,- նշեց Ծառուկյանը՝ առանց անուններ տալու, թեեւ պարզ է, թե ում է ուղղված:

Անի Սահակյան