Արայիկ Հարությունյանի «մելկի տրյուկները»
Իշխանություններն ամեն գնով փորձում են օղակը սեղմել ԵՊՀ-ի շուրջ,ավելի ճիշտ ԵՊՀ ռեկտոր Արամ Սիմոնյանի։ Պարբերաբար տեղեկություններ են շրջանառվում, թե ապրիլի կեսերին հոգաբարձուների խորհրդի նոր նիստ կկազմակերպվի, որպեսզի ռեկտորի լիազորությունները վաղաժամ դադարեցվի, պաշտոնապես հերքվում է այդ տեղեկությունը, ինչը նշանակում է, որ իշխանությունները չեն կարողանում այս խորհրդում մեծամասնության ձայների վրա ազդեցություն ունենալ, ինչը շատ բնական է։ Քանի որ այն, ինչ կատարվում է ԵՊՀ ռեկտորի շուրջ, անգամ մանր վրեժխնդրություն չէ, իհարկե, բոլորիս է հայտնի, որ Նիկոլ Փաշինյանը փոքրիկ վրիժառու է, բայց կյանքը ցույց տվեց, որ Արամ Սիմոնյանը այնքան խոցելի չէ, որպեսզի Փաշինյանը բռնել-փակելու, ազատազրկելու օպերացիան արդյունք տա։ Ինչպես հայտնի է հեղափոխությունից անմիջապես հետո նոր իշխանություններն ի դեմս ՊՎԾ-ի լծվեցին ԵՊՀ-ում ստուգումների, ՊՎԾ ղեկավար Դավիթ Սանասարյանն անգամ ժամանակից առաջ ընկավ եւ խախտելով անմեղության կանխավարկածը ֆեյսբուքյան իր էջում մի շարք մեղադրական հայտարարություններ արեց, մասնավորապես, ԵՊՀ ռեկտորին մեղադրելով 800 միլիոն չարաշահումների մեջ։ Արամ Սիմոնյանն էլ ի պատասխան բարձրաձայնեց, որ գործընթացը տեղի է ունեցել օրենքի կոպիտ խախտմամբ, ծառայությունից իրավունք չունեին հրապարակել փաստաթուղթը առանց ԵՊՀ-ից կարծիք ստանալու:
«Նա իրավունք չունի իրեն վերագրելու վարչապետի գործառույթներ: Միայն վարչապետը իրավունք ունի՝ ստուգման արդյունքները իրեն ներկայացնելուց հետո որոշում կայացնել և ստուգման արդյունքները ուղարկել դատախազություն: Մինչդեռ այս պարոնը, որը ղեկավարում է վերահսկողական ծառայությունը, իրեն վերապահել է ոչնչով չարդարացված և օրենքով չնախատեսված՝ վարչապետի գործառույթներ», - հայտարարեց ԵՊՀ ռեկտորը, ապա նաեւ դիմեց բարձրաստիճան պաշտոնյաների էթիկայի հանձնաժողով, իսկ օրերս մենք տեսանք հանձնաժողովի որոշումը առ այն, որ Դավիթ Սանասարյանը թույլ է տվել Հանրային ծառայության մասին օրենքի էթիկայի կանոնի խախտում, «այն է՝ իր գործունեությամբ չի նպաստել իր զբաղեցրած պաշտոնի և իր ներկայացրած մարմնի նկատմամբ վստահության և հարգանքի ձևավորմանը»: Եւ ահա, իրավական արշավի ժամանակ ըստ էության պարզ դարձավ, որ չեն կարող Սիմոնյանի դեմ գործ հարուցել , քանի որ չկան համապատասխան հիմնավորումներ, անցան քաղաքական շանտաժի։ Նիկոլ Փաշինյանը բացահայտ հայտարարեց, որ «նման ռեկտորները» նոր Հայաստանում այլևս անելիք չունեն: Հետաքրքիր է, թե ով է տվել Փաշինյանին այդ իրավունքը՝ որոշելու, թե ով կարող է ապրել Հայաստանում, ով ոչ։ Փաշինյանի ջղաձգումներից պարզ է դառնում, որ խնդիրը գուցե անգամ Արամ Սիմոնյանն էլ չէ, այլ կառույցն ընդհանրապես, քանի որ այդպիսով նա փորձ է անում կոտրել մտածող մարդկանց, ինտելեկտուալ բարձր մակարդակ կրողների ողնաշարը՝ ի դեմս ԵՊՀ-ի, ասելով, որ ինքն է որոշելու այսուհետ՝ ով մնա Հայաստանում, ով գնա, ու հանկարծ որեւէ մեկի մտքով չանցնի ինքնուրույնության, անկախության նշույլներ դրսեւորել։ Ի դեպ, համալսարանում երանությամբ են հիշում, որ անգամ Սերժ Սարգսյանի ժամանակ այսպիսի բռնապետական ու հակաժողովրդական մթնոլորտ չկար ու ԵՊՀ-ում դասավանդող շատ ու շատ քաղաքական գործիչներ կարողանում էին ազատ արտահայտել իրենց կարծիքը։ Ավելին, ներվում էր անգամ ներկայիս ԿԳ նախարար , նախկին դասախոս Արայիկ Հարությունյանի բազում բացակայություններն ու անփույթ աշխատանքը։ Հիմա միգուցե Հարությունյանը Արամ Սիմոնյանի արած «լավությունների» պատասխանն է տալիս եւ իրեն պահում ամենավերջին ապերախտի պես։
Անի Սահակյան
Հետևեք մեզ Viber-ում
