Կոռուպցիոն ռիսկեր․ովքեր են Իմ Քայլի անանուն նվիրատուները

Վարչապետ Փաշինյան Նիկոլի կնոջ՝ Աննա Հակոբյանի «Իմ քայլը» հիմնադրամը հրապարակել է նվիրատուների ցանկը: Ամիսներ շարունակ չեն դադարում հրապարակումները, որ պաշտոնյաներին՝ նախարարներ, մարզպետներ, հրապարակված է պարգեւատրել իրենց եւ այդ գումարները փոխանցել Աննա Հակոբյանի հիմնադրամին:Ջրային կոմիտեի այլեւս նախկին ղեկավար Ինեսա Գաբայանը միայն հրապարակային խոստովանեց այդ մասին եւ մեկ ամիս հետո նա հրաժեշտ տվեց պաշտոնին: Եւ ահա, հրապարակվել է նվիրատուների ցանկը, որում աչք է զարնում անանուն նվիրատուների առատությունն ու գումարի չափը:

Բայց մինչ անդրադառնալն անանուն նվիրատուներին, նշենք, որ հայտնի նվիրատուների շարքում ամենախոշորը Գագիկ Ծառուկյանն է, ավելի ճիշտ՝ նրա կինը: Տիկին Ջավահիրը փոխանցել է հիմնադրամին 12 միլիոն դրամ: «Իմ քայլը» հիմնադրամի նվիրատուներից է նաեւ ֆինանսների նախկին նախարար Գագիկ Խաչատրյանը:

Նրա ընտանիքին պատկանող «Մեգասպորտ» ընկերությունը հիմնադրամին է նվիրաբերել ավելի քան 5 մլն 930 հազար դրամ: Հրապարակված անունների մի մասն էլ նախկին ու ներկա պաշտոնյաներ են։ Օրինակ, «Իմ քայլը» խմբակցության պատգամավոր Վահագն Թևոսյանը հիմնադրամին նվիրատվություն է կատարել մի քանի անգամ՝ 100 հազար, 200 հազար, 252 հազար դրամի և այլ չափերո: 25 հազար դոլարի նվիրատվություն է կատարել »Հայաստան» համահայկան հիմնադրամի հոգեբարձունների խորհրդի անդամ Գաբրիել Չենբերջյանը, որը Սերժ Սարգսյանի եղբոր՝ Լեւոն Սարգսյանի մտերիմներից է: 100 հազար դոլար է նվիրաբերել Արա Աբրահամյանը, ըստ ամենայնի խոսքը Ռուսաստանի հայերի միության նախագահի մասին է։ Ցանկում շատ են անանուն նվիրատվությունները: Դրանք տատանվում են մի քանի միլիոն դրամից մինչեւ շուրջ կես միլիոն դոլար։ Մասնավորապես՝ երկու անանուն նիրատուներ փոխանցել են 500 եւ 400 հազար դոլար գումար, համապատասխանաբար զինծառայողների վերականգնողական կենտրոնի եւ Մեղրու մանկապարտեզի նորոգման համար։

Տարօրինակ ու կասկածելի է, որ նվիրատուների զգալի մասի անունները հրապարակված չեն։ Ովքեր եւ ինչու են մուծվել Հակոբյան Աննային, այս դեպքում կասկածների ու ենթադրությունների տեղիք է տալիս, քանզի հանրությունը կարող է ենթադրել, որ դա արվում է տարրական վախից, ոմանք այդպիսով <<փրկագին>> կարող էին տալ՝ խուսանավելով նախկինում կատարած ապօրինություններից, ոմանք ապահով աշխատելու երաշխավորագիր, ոմանք էլ դրա դիմաց ինչ-որ բան ստանալու ակնկալիքով: Կարող ենք նաեւ կասկածել, որ վարչապետի կնոջ հիմնադրամը այդպիսով կարող է բյուջեից փող դուրս բերելու խողովակ դառնալ։

«Հիմնադրամների մասին» ՀՀ օրենքի 39-րդ հոդվածն ունի հետեւյալ բովանդակությունը․ «Յուրաքանչյուր տարի, հաշվետու տարվան հաջորդող մարտի 25-ից ոչ ուշ, հիմնադրամն azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում պարտավոր է հրապարակել հաշվետվություն իր գործունեության մասին: Հաշվետվությունը պետք է պարունակի տեղեկություններ իրականացված ծրագրերի, ֆինանսավորման աղբյուրների, ֆինանսական տարում օգտագործված միջոցների ընդհանուր չափի եւ դրանցում կանոնադրական նպատակների իրականացմանն ուղղված ծախսերի չափի, հիմնադրի, հոգաբարձուների խորհրդի անդամների, կառավարչի եւ հիմնադրամի աշխատակազմում ընդգրկված անձանց անուններն ու ազգանունները, եթե նրանք օգտվել են հիմնադրամի միջոցներից եւ ծառայություններից հաշվետու տարվա ընթացքում»։ Այսինքն սա նշանակում է, որ պետք է թափանցիկ ձեւով տեղեկացնել նաեւ ֆինանսավորման աղբյուրները:

Անի Սահակյան