Ալիևը չսպասեց Փաշինյանի հետ առաջիկա հանդիպմանը. Իսկական փակուղի
Ղարաբաղյան խնդիրը կարող է կարգավորվել միայն Ադրբեջանի տարածքային ամբողջականության շրջանակում, երեկ Նովրուզի առթիվ հրապարակած շնորհավորական ուղերձում հայտարարել է Իլհամ Ալիևը: Ադրբեջանի նախագահը վերստին նշել է՝ Բաքուն դեմ է բանակցային ձևաչափի փոփոխությանը, և պնդել, թե այս դիրքորոշումը պաշտպանում են նաև խնդրով զբաղվող միջնորդները: «Հայկական կողմը հարց է բարձրացրել բանակցային ձևաչափի փոփոխության մասին, Ադրբեջանը, բնականաբար, դեմ է դրան: Միաժամանակ, Մինսկի խմբի համանախագահները՝ Միացյալ Նահանգների, Ֆրանսիայի, Ռուսաստանի ներկայացուցիչները, հանդես գալով կարևոր հայտարարությամբ, ընդգծեցին, որ ձևաչափը պետք է մնա անփոփոխ: Նույնաբովանդակ հայտարարություններով հանդես եկան նաև Եվրամիության բարձրաստիճան պաշտոնյաները: Սա միանշանակ լուրջ ազդակ է Հայաստանի համար և վկայում է, որ Ադրբեջանի դիրքորոշումը գնալով ավելի մեծ աջակցություն է ստանում», - ասել է Ալիևը: Հիշեցնենք, որ Հայաստանի վարչապետ Նիկոլ Փաշինյանը նախօրեին հայտարարել էր՝ Ղարաբաղը բանակցային սեղան վերադարձնելու առաջարկը ոչ թե ձևաչափի փոփոխության, այլ բանակցային ձևաչափի վերականգնման առաջարկ է, փաստելով, որ 1994թ. հրադադարի համաձայնագիրը ստորագրվել է հակամարտող երեք կողմերի՝ Հայաստանի, Ղարաբաղի և Ադրբեջանի կողմից, հետո էլ այդ ձևաչափն ամրագրվել է միջազգային այլ փաստաթղթերում: Ադրբեջանի նախագահն, իհարկե, երեկ հայկական կողմի վերոնշյալ փաստարկներին որևէ կերպ չի արձագանքել: Իլհամ Ալիևը միայն պնդել է, որ «Ղարաբաղը Ադրբեջանի պատմական տարածքն է, և խնդիրը պետք է կարգավորվի Ադրբեջանի տարածքային ամբողջականության շրջանակներում»: Խոսելով բանակցությունների մասին՝ Ալիևը միաժամանակ ընդգծել է, որ դրանց զուգահեռ Ադրբեջանը շարունակում է իր ռազմական ներուժը հզորացնել․ - «Անցած տարի անցկացված երկու ռազմական շքերթները ցույց տվեցին ողջ աշխարհին մեր զինուժի հզորությունը: Այս տարի, ինչպես նաև առաջիկա տարիներին մենք անելու ենք ամեն հնարավորը մեր բանակաշինության համար: Ադրբեջանի բանակը զինվում է ամենաարդիական տեխնիկայով, և մեր անվտանգությունն օր-օրի ավելի է ամրապնդվում»: Այսպիսով, պաշտոնական Երևանն ու Բաքուն անցնել են միմյանց հրապարակային ուղերձներ հղելուն: Ալիևը չսպասեց Ալիևի հետ առաջիկա հանդիպմանը: Նա կրկին պատասխանեց Փաշինյանի վերջին հայտարարությանը: Նշանակում է, Փաշինյան-Ալիև հաջորդ հանդիպումը դառնալու է առավելապես որոշակիորեն լարված հանդիպում, եթե Փաշինյանի նշած մի սկզբունք ի սկզբանե և միջնորդները, Ալիևը մերժում են: Մյուս սկզբունքները, որոն Փաշինյանը գտնում է, որ պարզաբանման կարիք ունեն, դրանց դեպքում ևս՝ Ալիևն ունի իր բացատրությունները: Մնում է հարցը, թե այդ սկզբունքների վերաբերյալ, որոնք են Փաշինյանի պատկերացումները, նա Փաշինյանի հետ հաջորդ հանդիպմանը կարողանալու է օրինակ՝ Արցախի՝ բանակցությունների սեղանին վերադառնալու հարցն այնպես հիմնավորել, որ դա չթվա որպես «քմահաճույք»: Նույնը նաև մյուս սկզբունքների պարագայում:
Թամար Բագրատունի
Հետևեք մեզ Viber-ում
