Մտան «խաղաղասերի» դերի մեջ
Այնքան Հայաստանից հայտարարեցին, որ Ադրբեջանում պատրաստ չեն խաղաղության՝ պաշտոնական Բաքուն որոշեց այդ թեմային էլ անդրադառնալ: Ադրբեջանի նախագահի խորհրդական Հիքմեթ Հաջիևը «Անադոլու» լրատվական գործակալության հետ զրույցի ընթացքում անդրադարձել է նաև Ղարաբաղյան հակամարտության թեմային։ Մեկնաբանելով ԵԱՀԿ Մինսկի խմբի համանախագահների հայտարարությունը, նա մասնավորապես ասել է․ «Կարող եմ վստահաբար ասել, որ ադրբեջանցի ժողովուրդը պատրաստ է խաղաղության։ Սակայն միայն արդարացի կարգավորումը կնպաստի կայուն խաղաղությանը։ Հայկական զորքերը պետք է հեռանան ադրբեջանական տարածքներից, իսկ փախստականները՝ վերադառնան իրենց տները։ Միայն այդպես է կարելի հասնել արդարացի խաղաղության։ Ադրբեջանցի ժողովուրդը պատրաստ է նման խաղաղության։ Սակայն Հայաստանի պատկերացումները խաղաղության մասին հակասում են միջազգային իրավունքի նորմերին։ Հայաստանը կարծում է, որ ադրբեջանական տարածքների զավթումն արդեն խաղաղության հաստատում է։ Դա անհնար է անվանել խաղաղություն։ Հայ ժողովուրդը պետք է հիմնավորապես պատրաստվի խաղաղության գործընթացին։ Հայաստանը պետք է վերադարձնի այն հողերը, որոնք իրեն չեն պատկանում, և ապրի խաղաղության մեջ՝ Ադրբեջանի և մյուս հարևան երկրների հետ»։ Նա նաև հավելել է, որ «Հայաստանի նվաճողական քաղաքականությունը սպառնալիք է տարածաշրջանի կայունության և խաղաղության համար։ Այդ քաղաքականությունը ցանկացած պահի կարող է բերել սրացման և լարվածության աճի։ Պատասխանատվությունը լինելու է Հայաստանի ուսերին»,- ասել է Ադրբեջանի բարձրաստիճան պաշտոնյան։ Ապա՝ Հիքմեթ Հաջիևը անցել է սպառնալիքների հաջորդ փուլին. «Պաշտոնական Բաքուն ավելի քան քսանհինգ տարի հանդես է գալիս Լեռնային Ղարաբաղյան հակամարտության խաղաղ կարգավորման օգտին։ Սակայն Ադրբեջանի համբերությունն էլ սահման ունի», ասել նա՝ կրկին նշելով, որ «Հայաստանին զինված ուժերը պետք է հեռանան Ադրբեջանի հողերից, համաձայն ՄԱԿ ԱԽ բանաձևերի։ Հակառակ դեպքում, Ադրբեջանը, որպես ցանկացած այլ պետություն կօգտվի իր բոլոր իրավունքներից, համաձայն ՄԱԿ Կանոնադրության»,- Anadolu լրատվական գործակալության հետ զրույցում հայտարարել է Ադրբեջանի նախագահի խորհրդականը։ Հետաքրքրականն այն է, որ ադրբեջանցի պաշտոնյան արդեն դժգոհել է, թե՝ «ցավոք Հայաստանի ներկայիս ղեկավարությունը կրկնում է Քոչարյան և Սարգսյան նախագահների կառավարման ժամանակների սխալները, հանդես գալով հայտարարություններով, որոնք արգելափակում են խաղաղ բանակցությունները»։ Այսպես, Բաքուն «խաղաղության» դերի մեջ մտած՝ շարունակում է սպառնալիքները, մյուս կողմից Երևանից հորդորելով «կառուցողական» և «ճիշտ» քայլեր։ Ի դեպ, «խաղաղասեր» Ալիևը երեկ Բաքվի կենտրոնում զբոսնել է, շփվել, լուսանկարվել համաերկրացիների հետ, մի բան, որ նա երբեք չէր անում: Այս քայլով էլ նա ցույց է տալիս, որ վայելում է համաժողովրդական սեր, ինչպես Հայաստանում՝ Փաշինյանը, հետևաբար, նա ևս «ուժեղ» առաջնորդ է: Մետաքսյա Շալունց