Վտանգավոր նույնացում. ընդդիմության ականապատումը

«Ժամանակ»-ը գրում է. «Հայաստանում կա տարածված մտայնություն այն մասին, որ ներկայումս տեղեկատվական դաշտի զգալի մասը ընդդիմության ձեռքին է, կամ ընդդիմությունն ունի տեղեկատվական դաշտի ավելի մեծ ռեսուրս, քան իշխանությունը: Այս պարագայում չունենք մեդիադաշտի հարաբերակցությանն անդրադառնալու անհրաժեշտություն: Տարածված մտայնությունն իր մեջ կրում է մի նրբերանգ, որը առնչվում է քաղաքական համակարգին և դրա հեռանկարներին: Բանն այն է, որ այստեղ ընդդիմություն ասելով՝ հասկացվում են նաև նախկին իշխանությանն առնչվող շրջանակներն ու խմբերը: Դա մոլորություն է կամ ավելի շուտ գուցե թյուրըմբռնում, հնարավոր է նաև հանրությանը մոլորեցնելու փորձ: Բանն այն է, որ ընդդիմություն և նախկին իշխանական համակարգ, նախկին իշխող համակարգ հասկացությունները համադրելի չեն և դրանց նույնացումը հարվածում է Հայաստանում նոր ընդդիմության կայացման հեռանկարին: Նախկին իշխող համակարգը չի կարող համարվել ընդդիմություն, չի կարող լինել այդպիսին: Ընդ որում, պատճառն այն չէ, որ այդ համակարգի մի զգալի մասը, այդ թվում՝ լրատվական ռեսուրս տնօրինող, իրեն հայտարարել է քաղաքական կարգավիճակից դուրս: Խորքային պատճառն այն է, որ նախկին իշխող համակարգը քաղաքական կարգավիճակից դուրս է դրել հանրությանը, ու անգամ նոր իշխանության հանդեպ դժգոհ հանրային շերտերը կամ խմբերը, այդ իմաստով հստակ տարբերակում են վերաբերմունքը նախկին իշխող համակարգի հանդեպ: Հենց այդ վերաբերմունքն է, որ բացառում է այդ համակարգի «ընդդիմադիրացումը», առնվազն այնքան, քանի դեռ այդ համակարգի որևէ խումբ չի ունեցել հենց նույն համակարգի իշխանական գործունեությանը քաղաքական ամբողջական գնահատական տալու համարձակություն: Բայց այդ դաշտում այդպիսի խնդիր դրված չէ որևէ մեկի մոտ»,-գրում է թերթը: Նյութն ամբողջությամբ կարդացեք թերթի այսօրվա համարում: