Արայիկ Հարությունյանը՝ Ավշարի դպրոցում լարված իրավիճակի մասին
Ավշարի դպրոցում պրոցեսներ են տեղի ունեցել, որոնք, ցավոք, մինչև հիմա չեն կարգավորվում: ԱԺ-ում լրագրողների հետ զրույցում այս մասին ասաց ԿԳ նախարար Արայիկ Հարությունյանը՝ անդրադառնալով դպրոցում տեղի ունեցող դասադուլներին ու գործադուլին: Նախարարը նշեց, որ նախարարության ներկայացուցիչներ են եղել դպրոցում և փորձում են վերականգնել աշակերտների իրավունքները: «Ավշարի դպրոցը մարզպետարանի ենթակայության դպրոց է և այնտեղ որոշ պրոցեսներ են տեղի ունեցել, որոնք ցավոք սրտի, մինչև հիմա չեն կարգավորվում: Աշակերտների իրավունքները պետք է վերականգնվեն, բայց նրանց կողմից ներկայացվող վերջնագրերը՝ չգնալ դասի մինչև տնօրենը չհեռանա, ես կարծում եմ, որ ճիշտ չէ»,- ասաց նա: Հարցին, թե Կրթության և գիտության նախարարությունը որևէ միջոց չի ձեռնարկել իրավիճակի կայունացման համար, նախարարը նշեց, որ իրենք միանշանակ հետևողական են և արդեն մի քանի օր է` նախարարությունից աշխատակիցներ են գնում Ավշարի դպրոց: «Աշակերտների իրավունքները, իհարկե, պետք է վերականգնվեն, սակայն, ծնողները ևս պետք է օգնեն մեզ: Դա չպետք է արվի աշակերտների կրթական իրավունքները խախտելով»,-եզրափակեց ԿԳ նախարարը:
Հետևեք մեզ Viber-ում
