Նիկոլ Փաշինյանը՝ իր ընտանիքի ծախսերի մասին
«Իմ ընտանիքն ապրել է այնպես, ինչպես նախկինում, բայց արարողակարգային որոշ նրբություններով, ավելի ճիշտ՝ անհրաժեշտություններով: Մենք հիմա ապրում ենք այդ առանձնատանը, Սևանում էլ կա ամառանոց, էնտեղ էլ ենք գնում: Շահարկումներ են հնչում ընտանիքիս ևս Արցախ տանելու մասին: Չեմ պատկերացնում՝ գնամ Արցախ ու էնտեղ ծառայող տղայիս մորն ու քույրերին չտանեմ ինձ հետ»,- այսօրվա ասուլիսի ժամանակ ասաց ՀՀ վարչապետը: Այնուհետև շարունակելով ասաց. «Ես գիտեի, որ շատ կարեւոր տեքստ պետք է ասեմ Ստեփանակերտում: Ես այդ տեքստի վրա աշխատում էի, եւ դա շատ նուրբ իրավիճակ էր: Ինձ համար շատ կարեւոր են եղել այն խոսակցությունները, որ մենք ունեցել ենք. սեղանի շուրջ նստած է եղել իմ զինվոր տղան, զինվորի մայրը, զինվորի քույրը: Ես ոչ թե քննարկել եմ, այլ փորձել եմ իրենց զգացողությունները հասկանալ Ղարաբաղի հարցի, նրա նյուանսների, ընթացիկ իրավիճակի մասին նրանց զգացողությունների մասին: Ինձ համար շատ կարեւոր էր խոսել ընտանիքի անդամների հետ, եւ ֆիզիկապես լինել Ղարաբաղում: Աբսուրդ բան ասեմ, կարող է շատ կարեւոր բանակցություններից առաջ, կարող է որոշեմ, որ նախորդ գիշերը Արփին պետք է իմ ծոցը քնի, որովհետեւ դա ինձ համար կարեւոր է: Ինձ համար իմ ընտանիքը շատ կարեւոր է: Այն մարդը, ում համար իր ընտանիքը կարեւոր չի, ես դա ճիշտ չեմ հասկանա: Ես հասկանում եմ, որ իմ ընտանիքը հանրության ուշադրության կենտրոնում է, եւ ես հավաստաիցանում եմ, որ մեզնից յուրաքանչյուրը դա հասկանում է: Որեւէ կասկած չի կարող լինել, որ մենք մեր կարգավիճակը չենք չարաշահում: Մենք երբեք ճոխություններ չենք ունեցել եւ չենք սիրել: Ասում են՝ թիկնազորով են շրջում: ՀՀ օրենսդրության մեջ գրված է, որ վարչապետի ընտանքի անդամները պետք է ունենան պետական պահպանություն եւ իրավունք չունեն հրաժարվել դրանից»,– ասաց նա:
Հետևեք մեզ Viber-ում
