«Չգիտեմ, թե էլ ինչ է պետք, որպեսզի Անանյանի դեմ գործ հարուցվի». փաստաբան

ՀՀ ՊԵԿ օպերատիվ հետախուզության վարչության պետ Կարեն Կարապետյանի փաստաբան Տիգրան Հայրապետյանն այսօր լրագրողների հետ զրույցում համոզմունք հայտնեց, որ վարչապետը պետք է կարողանա  տեղեկանալ իր ենթակայության տակ գտնվող կառույցների գործունեությանը: Ինչպես ասաց` եթե չի տեղեկանում, ուրեմն չի կարող զբաղեցնել այդ պաշտոնը: «Իմ վստահորդ Կարեն Կարապետյանն այսօր ներկա չէ էթիկայի կանոններից ելնելով, քանի որ նա մտածում էր, որ օբյեկտիվ չի ստացվելու մեր այսօրվա զրույցը: ՊԵԿ նախագահը կոռուպցիոն համակարգերը հետազոտելու և վարչապետին զեկուցելու փոխարեն, ծառայողական քննություն է սկսում Կարեն Կարապետյանի նկատմամբ: Կարեն Կարապետյանի նկատմամբ նոր ճնշումներ են սկսվել և դատարանն էլ որոշել է քրեական գործը վերսկսել իմ վստահորդի նկատմամբ»,ասաց Տիգրան Հայրապետյանը, անդրադառնալով իր կողմից վերջերս արված հայտարարությանը, թե ՀՀ Պետական եկամուտների կոմիտեի նախագահ Դավիթ Անանյանը թույլ չի տալիս իր վստահորդին՝ կոռուպցիոն ռիսկեր բացահայտել և ներկայացնել ՀՀ վարչապետ Նիկոլ Փաշինյանին: Փաստաբանը վստահեցնում է՝ եթե դատարանի որոշումը չբավարարի իրենց՝ անպայման բողոքարկելու են այն, ինչպես նաև քրեական գործ պետք է հարուցվի ՊԵԿ նախագահ Դավիթ Անանյանի դեմ՝ այն բանի համար, որ Կարեն Կարապետյանի չաշխատելու դեպքում բյուջեից 4 միլիոնից ավել գումար է դուրս գրել իբրև աշխատավարձ. «Չգիտեմ, թե էլ ինչ է պետք, որպեսզի Անանյանի դեմ գործ հարուցվի, նա մսխել է բյուջեն: Օրենքը պարտավոր են պահել ու կապ չունի, թե ով ինչ պաշտոն է զբաղեցնում»: Փաստաբանը փոխանցում է, որ երեկ ևս գլխավոր դատախազին գրավոր դիմում են ուղարկել, որպեսզի նրանք պատասխանեն, թե ինչու են դադարեցրել Կարեն Կարապետյանի լիազորությունները՝ միևնույն ժամանակ՝ աշխատավարձ վճարել, այդպիսով նաև վատնելով պետական միջոցները: