Տրանսպորտի սակագնի հետ կապված խնդիր կա
«Մեծ խմբով և մեծ ժամանակային ռեսուրսով աշխատում ենք տրանսպորտի ցանցի բարելավման ծրագրի վրա, որը մեզ համար իրականացնրել է անգլիական WYG ընկերությունը Ծրագիրն ավարտական փուլում է, սակայն մենք ավարտին չենք հասցնում, որովհետև որոշ դրույթներ մեզ համար ընդունելի չեն և մենք բանակցում ենք այդ ընկերության հետ»,- լրագրողների հետ հանդիպման ժամանակ ասաց Երևանի փոխքաղաքապետ Հայկ Սարգսյանը: «Վերջին անգամ քաղաքապետի ներկայությամբ ընկերության ներկայացուցիչների հետ հանդիպում է տեղի ունեցել նախորդ շաբաթ: Հանդիպման արդյունքում եկել են եզրահանգման, որ ծրագրում կան վերանայումների և բարելավումների անհրաժեշտություն` կապված տոմսի սակագնի հաշվարկի հետ: Այս փուլում դեռ ծրագրի մշակման աշխատանքն ավարտված չէ, ու մենք չենք ստորագրում պայմանագիրը, քանի դեռ մեր նախանշված պայմանները այդ թվում` սակագնի հաշվարկի մոդելը մեզ չեն հրամցվել այնքան պարզ ու մատչելի, որպեսզի կարողանանք գնահատել ստացված պրոդուկտը»,- ասաց նա: Հարցին` խոսքը նախորդ իշխանությունների մշակած ծրագրի մասի՞ն է, նոր ծրագիր չի՞ մշակվել՞, փոխքաղաքապետը հաստատեց. «Խոսքը մինչև մեր պատասխանատվությունը ստանձնելը գոյություն ունեցող ծրագրի մասին է:Ընկերությունը խոստացել է, որ մինչև հունվարի վերջ կստանան իրենց կողմից ակնկալվող և պահանջվող ամբողջ տեղեկատվական և բացատրական բազան ,որի հիման վրա էլ կհասկանան հնարավո՞ր է գնահատել այն բավարար և կատարված: Եթե այո, կստորագրենք, եթե ոչ, կշարունակենք այնքան, մինչև որ ծրագիրը կգա վերջնական տեսքի այնպես, որպեսզի կարողանանք դա դնել մրցույթի»: Հարցին էլ ծրագրի ստորագրումից հետո ինչքան ժամանակ կպահանջվի տրանսպորտային ցանցի բարելավման համար, փոխքաղաքապետը հստակ պատասխան չտվեց: «Ծրագրի ընդունմանը հաջորդում է ծրագրի մեկնարկային և գնահատման աշխատանքը, արժեքը: Դրան հաջորդում է ծրագրի մրցույթին դրման գործընթացը: Մրցույթն առնվազն վեց ամիս կարող է տևել: Այս պրոցեսից հետո կսկսվի մրցույթի հաղթողի հետ աշխատանքային բանակցային գործընթացները և այլն»,- ասաց նա:
Հետևեք մեզ Viber-ում
