ՀՀԿ-ն կբողոքարկի՞ քվեարկության արդյունքները

ՀՀԿ-ն չի բողոքարկի քվեարկության արդյունքները։ «Կան որոշակի խախտումներ, բայց չեմ կարծում, որ դրանց ծավալն այնպիսին է, որ ազդեն ընտրության արդյունքների վրա»,- Hraparak.am-ի հետ զրույցում հայտնել է ՀՀԿ նախընտրական շտաբի ղեկավար Դավիթ Հարությունյանը։ Դիտարկմանը, որ ՀՀԿ-ին մոտ 4000 ձայն էր պակասում ԱԺ անցնելու համար, կասկած կա, որ եթե ամեն տեղամասում 2 քվեաթերթիկ էլ անվավեր ճանաչեին կամ պակաս հաշվեին, այդ 4000-ը կլրանար. Հնարավո՞ր չէ վերահաշվարկի պահանջ դնեք, Դավիթ Հարությունյանն արձագանքել է. «Իրատեսական չէ այդ բոլոր տեղամասերը ստուգել։ Հա, կան որոշ տեղեկություններ, որ այս կամ այն տեղամասում, ենթադրենք, անվավերի հարցում սխալ է եղել հանձնաժողովի մոտեցումը, և այն, ինչ պետք է անվավեր համարվեր թեկնածուի համար, անվավեր է համարվել կուսակցության համար։ Բայց նման դեպքերի տեղեկատվությունը բավարար ծավալ չի կազմում, որ իմաստալից դարձնի բողոքարկումը»: Հարցին, թե այսինքն՝ ՀՀԿ-ն պաշտոնապես ընդունո՞ւմ է քվեարկության արդյունքները, նա պատասխանել է. «Հա, ես կարծում եմ՝ մեր հայտարարությամբ դա ևս արտացոլված է»: Ավելի վաղ «Հրապարակ» թերթը գրել էր, որ ԱԺ ընտրությունների օրը մինչ տուն գնալը ՀՀԿ շտաբում քննարկման առարկա է եղել ընտրությունների արդյունքների բողոքարկման հարցը։ «Կարծիքները կիսվել են՝ ապացույցների լայն բազա է պետք դրա համար, ինչն այս պահին չկա՝ պնդել են բողոքարկմանը դեմ ՀՀԿ-ականները։ Բողոքարկելու հիմնական ջատագովներից է եղել ՀՀԿ կազմակերպիչ Ռուբեն Թադեւոսյանը, որը պնդել է, որ տարածքային մի շարք կառույցներից այլ արդյունքներ են ստացել, եւ հնարավոր է մնացյալ տեղերում եւս այդ վիճակը լինի։ Մյուսներն էլ ասել են, որ եթե անգամ երկաթյա ապացույցներ չկան, միեւնույն է, պետք է բողոքարկել, որպեսզի հետագայում որեւէ մեկի կողմից չասվի, թե իրենք այս ընտրությունների արդյունքները ճանաչել են, ինչպես վարվել էր ժամանակին Նիկոլ Փաշինյանը՝ ՍԴ չդիմելով»,- գրել է թերթը: