«Դեռևս չընտրված ԱԺ-ին սահմանված ժամկետից ավելի կարճ կյանք վերագրելը ծուղակ է». Ատոմ Մարգարյան
Տնտեսագետ Ատոմ Մարգարյանը ֆեյսբուքյան իր էջում գրել է․ «Երկու խոսք քարոզարշավի շուրջ` 1. Հակառակորդների սադրիչ մեղադրանքների պատասխաններով տարվելը չափազանց մեծ շռայլություն է հատկապես այն քաղաքական ուժերի համար, որոնք խորհրդարան անցնելու և կայուն մեծամասնություն ձևավորելու ստույգ շանսեր ունեն։ Դրա փոխարեն կարելի է ընտրողին մատուցել սեփական ծրագրերն ու տեսլականները, միաժամանակ՝ ճանաչելի դարձնել այն թեկնածուներին, ովքեր հայտնի չեն հանրությանը թեʹ խոսքով, թեʹ դեմքով, և թեʹ անցած ճանապարհով։ Քարոզարշավին տրված ժամանակը խիստ կարճ է, ու ընտրողին պոզիտիվ ազդակ հաղորդելու փոխարեն հակադարձող ցեխարձակումներով տարվելը միայն ձայների կորուստ կարող է նշանակել։ 2. Դեռևս չընտրված Ազգային ժողովին սահմանված ժամկետից ավելի կարճ կյանք վերագրելը ծուղակ է հենց այն քաղաքական ուժերի համար, ովքեր հրապարակ են նետել այդ թեզն ու շարունակաբար զարգացնում են։ Այնինչ, այս ընտրությունների գլխավոր առաքելությունը երկրում ընտրական գործընթացների օրինականության ու դրանց նկատմամբ հանրային վստահության վերականգումն է, ինչպես նաև օրինակարգ (լեգիտիմ) Ազգային ժողովի ձևավորումը։ Մնացածը հետագայի խնդիր է։ Ամեն ինչ միանգամից չի լինում։ Միայն կյանքը ցույց կտա, թե նոր Ազգային ժողովը ու նրա ձևավորված գործադիր իշխանությունը որքանով են ֆունկցիոնալ ու ադեկվատ երկրի առջև ծառացած մարտահրավերներին»։
Հետևեք մեզ Viber-ում
