Ռուսական դպրոց եմ կառուցելու, որ մեր հայրենակիցները գան՝ բնակարանը կա, դպրոցն էլ. Գագիկ Ծառուկյան

“ Հայաստանի միջին խավը 27 տարի բնակարան չի գնել, ինքը բնակարանաշինության ծրագիր է անում: Հայաստանի բոլոր խոշոր քաղաքաներում, ըստ նրա, նման քայլեր պետք է արվեն: Հայաստան եկող աբովյանցիների բնակարանային հարցերը լուծվում են, բայց մարդիկ բարձրացնում են նաև երեխաների դպրոցի հարցը: Ինձ ասում են, լավ, պարոն Ծառուկյան ջան, գալիս ենք, բնակարանի հարցը կարգավորել ենք, բա իմ երեխեն 5-6-րդ դասարան ա, կրթությունը հիմա ռուսական ա, որ գամ ո՞նց եմ անելու: Ասեցի՝ ճիշտ ես ասում: Ուրեմն դրա համար ես իմ աբովյանցիներին խոսք եմ տալիս, որ այդ թաղամասում նաև ռուսական դպրոց եմ կառուցելու, որ մեր հայրենակիցները գան, բնակարանը կա, դպրոցն էլ”,- ԲՀԿ առաջնորդ Գագիկ Ծառուկյանը Աբովյանում նախընտրական հանդիպման ժամանակ անդրադարձել է հայրենադարձության խնդրին: “ Խնդիրները պետք է կարգավորել, հետո մտածել ներգաղթի մասին: Այսօր մարդիկ, ես փշաքաղվում եմ, ասում են՝ Ծառուկյան ջան, գանք, բա իմ երեխեն ռուսական կրթություն ա ստացել: Եվ այդպես մենք բոլոր պայմանները պետք է ստեղծենք, բոլոր ոլորտներում պետք է աշխատել: Միայն ներդրումը չէ: Հարց չկա, ներդրումն անում են, բիզնեսի զարգացման համար է դա, բայց ընդհանուր ժողովրդի համար, բոլոր ոլորտներում տարեկան ներդրումներ պետք է արվեն”,- հավելեց նա: Գագիկ Ծառուկյանը նշեց, որ ներդրողին պետք չէ խնդրել, որ գա Հայաստան, պետք է պարզապես հարևան երկրների համեմատ հարկերը մի փոքր իջեցնել, և ներդրողը կգա: Ըստ նրա՝ մարդը տնտեսական աճը պետք է զգա իր վրա՝ իր սառնարանը բացելով: “Էսօր ոչ մեկի հետ խոսել չի լինում, վրդովված են, նեղված են, հիասթափված են: Բայց սաղ սպասում են, որ լավ ա լինելու: Այո, անպայման լավ ա լինելու, մենք թույլ չենք տալու, ամեն ինչ անելու ենք”,- նշեց նա: Այսօր, ըստ Ծառուկյանի, պետք է արվի տնտեսական հեղափոխություն, ինչի հնարավորությունը կա: