Կոռուպցիոն 23 բացահայտում՝ Կադաստրի կոմիտեում․ խոշոր պաշտոնյաներ են ներգրավված

Թվով 23 բացահայտումներ են եղել կադաստրում այս ընթացքում, որոնք ուղարկվել են իրավապահ մարմիններին։ Այս մասին այսօր՝ նոյեմբերի 27-ին, կատարված աշխատանքի ամփոփմանը նվիրված մամուլի ասուլիսին հայտարարեց կոմիտեի նախագահ Սարհատ Պետրոսյանը։ «Ես զսպել եմ ինձ այդ գայթակղությունից՝ չհայտարարելով այդ բացահայտումների մասին, բայց դրանցում շատ խոշոր գումարների մասին խոսք կա, նախկին խոշոր պաշտոնյաների անուններ կան, որոնք կթողենք իրավապահ մարմիններին, ովքեր գնահատականներ կտան»,-հայտարարեց կոմիտեի նախագահը։ Կոմիտեի նախագահը իր խոսքով «հանրության աչքի փուշը դարձած» չափագրումների ոլորտի ազատականացման որոշումը ճիշտ որոշում է  համարում, քանի որ այդ կոռումպացված հատվածը կադաստրից անցել է մասնավոր սեկտոր։ Նրա խոսքով՝ շատ նախնական հաշվարկներով պատճառված վնասները կարող են 2-3 մլն դոլարի հասնել։«Ստացել եմ մի ոլորտ, որը դժվար է միանշանակ բնորոշել որպես վատ եւ չկայացած, որովհետեւ Կադաստրի կոմիտեն տարբեր ղեկավարների ժամանակ գոնե երկու անգամ ապացուցել է, որ ինքը մեր երկրի ամենակայացած կառույցներից մեկն է: Դա վաղ 90-ականներին հիմնադրման ժամանակ էր, երբ կադաստրում ինտենսիվ աշխատանք էր տարվում միջազգային դոնորների շնորհիվ, ինչպես նաեւ 2010-ականի բարեփոխումները, երբ կադաստրի գրասենյակներում սկսեցին հանրային կառավարման նոր մշակույթի ներմուծումը: Դա, բնականաբար, չի նշանակում, որ ամեն ինչ լավ է եղել: Այո, կադաստրում եղել է կոռուպցիա, նույնիսկ կազմակերպված կոռուպցիա, եւ մենք ամեն ինչ արել ենք, որ դա կազմաքանդենք: Այսօր հանգիստ խղճով կարող ենք ասել, որ կադաստրում կազմակերպված կոռուպցիա չկա։ Բնականաբար, ամբողջովին չենք կարող բացառել, որովհետեւ այն մեծ համակարգ է, սակայն իրականացվող բարեփոխումները գնալով նվազեցնելու են այդ ամեն ինչը»,-նշեց նա։