Քանի դեռ Տիգրան Ավինյանը բանտախցում չէ, վարչապետի մտքով չանցնի խոսել կոռուպցիայի մասին. Շահնազարյան
«Նոր կառավարությունը կոռուպցիայի դեմ պայքարում ոչինչ չի արել: Քանի դեռ առաջին փոխվարչապետ Տիգրան Ավինյանը բանտախցում չէ, թող վարչապետի մտքով չանցնի խոսի կոռուպցիայի մասին: Որևէ իրական քայլ կոռուպցիայի դեմ չի կատարվել՝ ընդամենը պրոպագանդա է»,-Հայելի ակումբում լրագրողների հետ հանդիպմանն ասաց ԱԱԾ նախկին տնօրեն Դավիթ Շահնազարյանը: Հիշեցնենք՝ Տիգրան Ավինյանի ստեղծած ու չրի արտադրությամբ զբաղվող ընկերությունը 2018-ին հայտ է ներկայացրել և 35 հազար դոլար դրամաշնորհ ստացել գյուղատնտեսության զարգացման հիմնադրամից: «Որևէ լավ բան ընտրություններով չի լինելու: Այս ընտրությունների արդյունքում Հայաստանում չի հաստատվելու ներքաղաքական կայունություն: Ընտրությունների արդյունքները, ինչը կարձանագրվի, դրանք լավագույն դեպքում, ներկայացնելու են մեր հասարակության քաղաքական խճանկարը այդ պահին, իսկ մեկ ամիս, երեք ամիս անց այն լինելու է լրիվ ուրիշ», - անդրադառանալով առաջիկա խորհրդարանական ընտրություններին, ասաց ՀՀԿ նախընտրական ցուցակի անդամ Դավիթ Շահնազարյանը և ընդգծեց, որ ՀՀԿ-ն արել է երկու կարևոր քայլ՝ ի շահ պետության: «Առաջինը՝ այն, որ այսօր իշխող վարչախումբը անընդհատ շեշտում է, որ եղել է խաղաղ, թավշյա հեղափոխություն: Դա այդպես է եղել, դա իրենց պատճառով չի եղել, դա եղել է բացառապես նախկին իշխանությունների որոշումը», - ասաց Դ. Շահնազարյանը: Նա շեշտեց՝ առնվազն հարգանքի է արժանի ՀՀԿ-ի այս քայլը: «Եթե կարծում էին, որ իշխանությունն այնքան թույլ էր, որ չէր կարող ուժ կիրառեր, սխալվում էին: Ի՞նչ է, Լյովա Երանոսյանը չէ՞ր կարող ուժ կիրառել», - ասաց նա: «Մինչ ընտրությունները հանդիպել եմ ՀՀԿ ղեկավարներից մեկի հետ, որի անունը չեմ ուզում հայտարարել: Ասացի՝ մասնակցելու եք ընտրություններին, ասաց՝ եթե մենք ընտրություններին չմասնակցենք, ընտրությունների լեգիտիմությունը խիստ կասկածելի կլինի: Ու շատ վտանգավոր է այսօր ՀՀ-ում ունենալ կասկածելի ընտրություններ, չգնահատել նման փաստարկն ուղղակի չի կարելի», - ասաց Դավիթ Շահնազարյանը:
Հետևեք մեզ Viber-ում
