Եթե մտահոգ ես, ապա ... «գըմփ-գըմփ-հո՛ւ»
ԱԺ արտահերթ ընտրություններին մասնակցում է 11 քաղաքական ուժ՝ 2 դաշինք և 9 կուսակցություն: Քարոզարշավը մեկնարկել է: Ամեն մի ուժ իր ծրագիրը, կարգախոսն ու նպատակն է ներկայացնում: Դրանք ֆորմալ բաներ են: Իրականում շատերն առաջնորդվում են այնպիսի կարգախոսներով ու նպատակներով, որոնք հաճախ տարբերվում են հայտարարվածներից: Ելնելով ընտրական քվեաթերթիկում հայտնված ուժերի վարքագծից, «մեսիջներից» ու քաղաքական կշռից՝ ներկայացնենք, թե ով ինչու է մասնակցում ընտրություններին, ինչ կարգախոսով և ինչ հավակնություններ ունի: Եվ այսպես. ՀՀԿ Եթե մտահոգ ես, ապա ... մենք էլ ենք մտահոգ: Մեր նախկին ընտրազանգվա՛ծ, դուք մտահոգ եք, որ փող չի բաժանվելու, իսկ մենք մտահոգ ենք, որ փող չենք բաժանելու: Ինչքան չուզեք, էնքան «խփենք»: «Իմ քայլը» դաշինք Եթե մտահոգ ես ՀՀԿ-ով, ապա քա՛յլ արա, մերժի՛ր Սերժին: Նիկոլը՝ վարչապետ, իսկ մենք՝ պատգամավոր: Ինչքան ուզեք, էնքան «խփենք»: Ժողովուրդը դեռ մեզ հավատում է: «Դուխո՛վ»: Գըմփ-գըմփ-հո՛ւ: ԲՀԿ Ժողովուրդ ջան, ինչքան էլ ձեն ստանանք, էլի «քյարա»: «Լիժբը» խորհրդարան անցնենք: Մեր խոսքը ... խոսք է: Մենք միշտ Նիկոլի կողքին ենք լինելու, իրա ցավը տանենք: Էն Նաիրա Զոհրաբյանը մեր գծից շեղվել էր Երևանի ավագանու ընտրությունների ժամանակ, ու դրա համար մենք իրան աքսորել ենք Սյունիք: Մեր խոսքը ... «Լուսավոր Հայաստան» Հե՜յ գիդի Սերժի գյոզալական ժամանակներ ... Հանգիստ պատգամավոր էինք դառնում, իսկ հիմա ստիպված ենք ինքներս ձայն հավաքել: Թե ասա ինչի՞ մերժեցին Սերժին, հենա մեզ համար ապրում էինք ԱԺ-ում: Թե ասա ինչի՞ Նիկոլին պատգամավոր սարքեցինք, որ հետո էլ սենց կրակն ընկնեինք: Միամիտ լոռեցի ենք, էլի՛: «Մենք» դաշինք Հե՜յ գիդի Սերժի գյոզալական ժամանակներ ... Մենք քիչ ենք, բայց մեզ «արևմտամետ» են ասում, Մենք մեզ «լուսավոր» էդմոնենցից չենք գերադասում: Պարզապես էդմոնենք էլ պիտի ընդունեն, Որ մենք, միայն մենք Արամ Զավենիչ ունենք, որը մասնագիտությամբ Վազգեն Սարգսյանի եղբայր է աշխատում: Բայց ի՜նչ քցիբ մարդ դուրս եկավ Նիկոլը: Մեզ ու էդմոնենց «Իմ քայլը» ցուցակում տեղ չտվեց ու հիմա ստիպված ընկել, քվե ենք հավաքում: ՕԵԿ Հե՜յ գիդի Սերժի գյոզալական ժամանակներ ... ՀՅԴ Ախր մենք ինչպե՞ս վեր կենանք գնանք (խորհրդարանից): Հին ընկեր էինք, դարձանք հնամաշ: «Սասնա ծռեր» Նիկոլին գցել զիբիլի վեդրոն, իսկ մյուսներին՝ բռնել: ՊՊԾ գնդի գրավման օրը հայտարարել հայ ժողովրդի վերածննդի և ապստամբության իրավունքի պաշտպանության օր: Միաժամանակ պատերազմ հայտարարել Ռուսաստանին, Թուրքիային ու Ադրբեջանին՝ մտքում պահելով Վրաստանն ու Իրանը: Կարևորն այն է, որ Գարեգին Չուգասզյանը ժամանակին տեղ հասցնի իր հասցնելիքը. «Ծապլվարում» միշտ էլ փողը քչություն է անում: Ինչ վերաբերում է մյուս ուժերի մոտիվացիային, ապա այն տեղավորվում է օլիմպիական սկզբունքի շրջանակներում: Ինտրիգն այստեղ այն է, թե ակնհայտ հետնապահներից ո՞ր մեկը կհայտնվի վերջին տեղում, իսկ որը դրանց մեջ առաջին տեղը կգրավի: 7or.am Հայկ Ուսունց
Հետևեք մեզ Viber-ում
