Մենք ամուր ենք պահելու այդ դիրքորոշումը.Վիգեն Սարգսյան

Հետեւելով Ամենայն Հայոց Կաթողիկոս Գարեգին Երկրորդի հորդորին, այսօր կուսակից ընկերներով ու մեր ընտանիքներով Մուղնիի Սբ Գեւորգ եկեղեցում մասնակցեցինք կիրակնօրյա պատարագի։ Մեր Սահմանադրությունն առանձնակի շեշտադրում է անում պետության և Հայաստանյայց Առաքելական Սուրբ Եկեղեցու առանձնահատուկ հարաբերությունների վրա: Դա բնական է. այն պահին, երբ դադարում ենք ինքներս մեզ բնորոշել որպես առաջին քրիստոնյա պետություն, դառնում ենք պարզապես տարածք և բնակչություն: Մեր ժողովրդի կրած խաչը ոչ միայն մեր ինքնությունն է, հոգևոր արժեքն ու բարոյականությունը, այլև մեր անվտանգային համակարգի անբաժան մասը: Հանրապետականի իշխանություն լինելու տարիներին պետությունն ամեն կերպ աջակցում էր մեր ազգային եկեղեցու ամրապնդմանը և դերակատարման բարձրացմանը: Յուրաքանչյուր ապագա կառավարություն պետք է շարունակի անել դա, պետք է օգնի և երբեք չմիջամտի եկեղեցու գործերին: Որպես ազգային պահպանողական կուսակցություն մենք ամուր ենք պահելու այդ դիրքորոշումը: Մի քանի ժամից արդեն կմեկնարկի քարոզարշավը: Սա մեր երկրի ապագայի ընտրությունն է, հանուն անվտանգության, ազգային ինքնության պահպանման ու կայուն զարգացման։ Աստված մեզ պահապան: