«Այ սա եղել է այն կոալիցիայի գինը, որը մենք վճարել ենք»․ Արթուր Բաղդասարյան

Նոր Հայաստանում ասելիք պետք է ունենան նոր գաղափարներն ու փորձված գրագետ, կրթված տեսակը մարդու, որը կարող է ազգի առջեւ ծառացած խնդիրները լուծել։ Այս մասին այսօր՝ նոյեմբերի 24-ին, «Օրինաց երկիր» կուսակցության նախընտրական ծրագրի շնորհանդեսին ասաց կուսակցության ղեկավար Արթուր Բաղդասարյանը։ «Ոչ ոք ինձ չի կարող ու չի էլ մեղադրում ո´չ գողության, ո´չ թալանի, ո´չ անգրագիտության մեջ: Միշտ մի բան են ասում՝ 2008-ին ինչո՞ւ Սերժ Սարգսյանի հետ կոալիցիա կազմեցիք: Կազմեցինք, սխա´լ արեցինք, ներողություն, ժողովո´ւրդ ջան»,- նշեց կուսակցության ղեկավար Արթուր Բաղդասարյանը։ «Եթե ՀՀԿ-ն, ԲՀԿ-ն, ՀՅԴ-ն համագործակցել են իշխանության հետ մինչև 2018-ի ապրիլ, մենք 5 տարի առաջ ենք հեռացել՝ հրապարակային տարաձայնություններ արտահայտելով»,- հավելեց ՕԵԿ առաջնորդը: Արթուր Բաղդասարյանի խոսքով՝ իրենք այդ 5 տարիների ընթացքում բազմաթիվ բարեփոխումների հեղինակ են դարձել, օրինակ մանկապարտեզների անվճար դառնալը, ծնվող երեխային միանվագ նպաստ տալը, ավանդները վերադարձնելը, Լոռու եւ Շիրակի մարզին հարկային արտոնություններ տալու նախաձեռնությունը, պոլիկլինիկաների եւ ծննդօգնության անվճար լինելը․ «Այ սա եղել է այն կոալիցիայի գինը, որը մենք վճարել ենք»։