ՊՈԱԿ-ի տնօրենը մեղադրվում է միլիոնավոր դրամներ յուրացնելու մեջ

Արարատի մարզպետարանին կից «Գեղանիստի առողջության առաջնային պահպանման կենտրոն» ՊՍԱԿ տնօրեն Կամո Ստեփանյանին մեղադրանք է առաջադրվել առանձնապես խոշոր չափերով յուրացում կատարելու համար։ Կ.Ստեփանյանը ՊՈԱԿ-ի տնօրեն է հանդիսացել 2011 թվականից և օժտված եղել պետական կազմակերպության գույքը, այդ թվում՝ ֆինանսական միջոցները տնօրինելու լիազորությամբ։ Ըստ մեղադրանքի՝ նա կանխիկացնելու, իր անձնական հաշվեհամարին փոխանցելու եղանակով յուրացրել է ամբուլատորիայի հաշվեհամարին ՀՀ առողջապահության նախարարության կողմից փոխանցված ամբուլատորիայի աշխատակիցների՝ 2018 թվականի ապրիլ, հունիս և հուլիս ամիսների աշխատավարձերի, 2018 թվականի հունվարի 1-ից մինչև օգոստոս ամիսն ընկած ժամանակահատվածում «Գևորգ Կարապետյան ԱՁ» դեղատնից դուրս գրված դեղորայքի ու բուժ, պարագաների, «Մասիսի բժշկական կենտրոն» ՓԲԸ պոլիկլինիկա ուղեգրված համայնքի բնակիչների անվճար բուժզննման, ինչպես նաև եկամտահարկի ու սոցիալական վճարների համար նախատեսված գումարը։ Հափշտակված գումարի չափը նախնական տվյալներով կազմում է 5.357.500 ՀՀ դրամը: Կ.Ստեփանյանին մեղադրանք է առաջադրվել ՀՀ քրեական օրենսգպքի 179-րդ հոդվածի 3-րդ մասի 1-ին կետով։ Նրա նկատմամբ որպես խափանման միջոց է ընտրվել ստորագրություն չհեռանալու մասին։ Քրեական գործը գտնվում է Արարատի մարզի ընդհանուր իրավասության դատարանի վարույթում։