Թրամփը բացատրել է Խաշոգջիի պատճառով Սաուդյան Արաբիայի հետ պայմանագրերը չչեղարկելու որոշումը
Ինչպես նշում է Daily Mail-ը, ԱՄՆ նախագահ Դոնալդ Թրամփը, անդրադառնալով սաուդցի ընդդիմադիր լրագրող Ջամալ Խաշոգջիի աղմկահարույց սպանությանը, հայտարարել է, որ չի պատրաստվում պատժամիջոցներ կիրառել Սաուդյան Արաբիայի ու թագաժառանգ Մուհամադ բին Սալման ալ Սաուդի դեմ:
«Ապացույց չկա առ այն, որ հենց թագաժառանգն է պատվիրել այլախոհի դաժան սպանությունը:Նրա դեմ պատժամիջոցներ կիրառելը կնշանակի երկրորդ պլան մղել Ամերիկայի շահը: Հիշե՛ք՝ Ամերիկան առաջին տեղում է: Եթե պատժամիջոցներ կիրառենք, Ռուսաստանն ու Չինաստանը կսողոսկեն ու իրենց կվերցնեն Սաուդյան Արաբիայի ներդրումները: Չեմ պատրաստվում հարյուր միլիարդավոր դոլարները զիջել Ռուսաստանին, Չինաստանին կամ որևէ այլ երկրի: Ամերիկան առաջին տեղում է»,-ասել է նախագահը:
Թրամփն ընդգծել է, որ սաուդյան տնտեսությունում որևէ անձնական բիզնես շահ չունի:
«Այժմ խաղասեղանին են դրված խոշոր ներդրումներ, որոնք Սաուդյան Արաբիայի կողմից ԱՄՆ-ում 400 մլրդ դոլարանոց ներդրումային ծրագրի մասն են: Նրանք մեզ 400 մլրդ դոլար են վճարում. դա հավանաբար երբևէ Միացյալ Նահանգներին վճարված խոշորագույն գումարն է: Եթե կարծում եք, որ թույլ կտամ՝ զենքի վաճառքի միլիարդները գնան Ռուսաստան կամ Չինաստան, ապա սխալվում եք: Դա մեծ նվեր կլինի նրանց համար, բայց նրանք այդ նվերը չեն ստանա»,-ասել է ԱՄՆ նախագահը:
Նա հավելել է, որ Սաուդյան Արաբիայի հետ կնքված պայմանագրերը չեղարկելու դեպքում, համաշխարհային տնտեսությունը կտուժի, նավթի գները կբարձրանան:
Հետևեք մեզ Viber-ում
