Որ ուժի կողմից է առաջադրվել պաշտպանության նախկին փոխնախարարը

Պաշտպանության նախկին փոխնախարար Արտակ Զաքարյանը Facebook-ի  իր էջում գրառում է արել` տեղեկացնելով, որ Հանրապետական կուսակցության կողմից որոշել է առաջադրվել թիվ 2 ընտրատարածքում: «Սիրելի հայրենակից, Հայաստանում տեղի ունեցած քաղաքական փոփոխություններն ու ստեղծված իրավիճակը պահանջում են հետևություններ անել մեր պետության անցյալի, ներկայի ու ապագայի վերաբերյալ: Դա ինձ պարտավորեցնում է շարունակել քաղաքական պայքարը հանուն Հայաստանի և Արցախի: Ուստի որոշել եմ առաջիկա խորհրդարանական արտահերթ ընտրություններում, իմ կուսակցության ընտրացուցակով, որպես ԱԺ պատգամավորության թեկնածու առաջադրվել Երևանի Աջափնյակ, Դավիթաշեն, Արաբկիր վարչական շրջաններն ընդգրկող թիվ 2 ընտրատարածքում: Վճռականությամբ ու եռանդով պատրաստ եմ ընդդիմության շարքերում իմ տասնամյանկների փորձը, գիտելիքը, քաղաքական հմտությունները, արտաքին կապերը անմնացորդ ծառայեցնել առկա բոլոր խնդիրների լուծմանը: Զբաղեցնելով տարբեր պաշտոններ՝ երբեք չեմ գայթակղվել, ու չեմ փորձել այն ծառայեցնել իմ անձնական կամ այլ շահերին: Ազնվորեն ծառայել եմ, ծառայում եմ, և ծառայելու եմ իմ պետությանն ու ժողովրդին: Վստահ եմ, որ ընդդիմության շարքերում կարողանալու եմ ազդեցություն գործել և զերծ պահել իշխանություններին սխալ ու վտանգավոր քայլերից, ոչ արդյունավետ գործողություններից՝ տալով այլընտրանքային լուծումներ ու առաջարկություններ: Քարոզարշավի պաշտոնական մեկնարկից հետո մանրամասն Ձեր դատին կներկայացնեմ նախկինում կատարած իմ աշխատանքը և առաջիկայի համար նախատեսվող ծրագրերն ու անելիքները: Ձեր աջակցությամբ ու վստահությամբ պատրաստ եմ շարունակել իմ գործունեությունը՝ ի շահ բոլորիս ապագայի»,- գրել է նա