ՊԵԿ նախագահը բացատրել է Արարատյան մաքսատանը գոյացող հերթերի պատճառը

Կառավարության նիստից հետո ՊԵԿ նախագահ Դավիթ Անանյանը պատասխանել է Արարատյան մաքսատան հերթերի վերաբերյալ լրագրողների հարցին: Անանյանը մի քանի պատճառ է թվարկել, թե ինչու կարող էր նման իրավիճակ ստեղծվել: Նրա խոսքով՝ 3 պատճառները համադրելու դեպքում կստացվի հարցի պատասխանը: «Առաջինը, ՊԵԿ համապատասխան ծառայությունը կարելի է շատ ավելի արդյունավետ կազմակերպել: Այսինքն՝ մենք որոշակի առումով մեր մեղքն ընդունում ենք: Երկրորդ, տեխնիկական առումով նաև այնտեղ ոստիկանությունը  գազի հետ կապված որոշակի հերթեր է գոյացնում, որը մաքսային ձևակերպումների որևէ բաղադրիչ չի հանդիսանում: Հետևաբար, նաև հերթերի գոյացման պատճառը ոչ մաքսային մարմնի գործունեություն է: Եվ երրորդ, 2017 թվականի ընթացքում, եթե չեմ սխալվում, մոտ 27 հազար ավտոմեքենա է ներկրվել ՀՀ, այս տարվա 10 ամսվա կտրվածքով՝ արդեն 45 հազար: Այսինքն՝ մեքենաների հոսքն էլ է բավական շատ: Այս երեք պատճառները եթե համադրենք, կունենանք ձեր հարցի պատասխանը»,- ասաց Անանյանը