Երևանում կնոջը դաժան ծեծի ենթարկելու կասկածանքով ամուսինը ձերբակալվել է

Երևանում 20–ամյա կնոջը դաժան ծեծի ենթարկելու կասկածանքով ձերբակալվել է նրա ամուսինը՝ 30–ամյա Իլլարիոն Ն.-ն, Aysor.am-ը տեղեկանում է ՀՀ քննչական կոմիտեի լրատվական ծառայությունից։ Ըստ աղբյուրի, դեպքի առթիվ հարուցվել է քրեական գործ ՀՀ քրեական օրենսգրքի 112–րդ հոդվածի հատկանիշներով` dիտավորությամբ առողջությանը ծանր վնաս պատճառելը։ Նոյեմբերի 11-ին, ժամը 09.05-ին, հիվանդանոցից ոստիկանության Շենգավիթի բաժնում հաղորդում է ստացվել, որ շտապօգնության խումբը «պոլիտրավմա» ախտորոշմամբ Արին Բերդի փողոցի 2-րդ նրբանցքի տներից մեկից բուժօգնության է տեղափոխել 1998 թ. ծնված Քրիստինե Իսկանդարյանին: Ոստիկանության ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ տանը վիճաբանության ժամանակ 1988 թ. ծնված Իլլարիոն Ն.-ն հարվածներ է հասցրել կնոջը` Ք. Իսկանդարյանին՝ պատճառելով վնասվածքներ: Իլլարիոն Ն.-ն, նույն օրը, ժամը 10.30-ին, բերման է ենթարկվել բաժին, տվել խոստովանական բացատրություն և բաց է թողնվել: Ք.Իսկանդարյանը ի վիճակի չի եղել բացատրություն տալու:Ավելի ուշ արդեն նոյեմբերի 12-ին հիվանդանոցից ոստիկանություն հաղորդում է ստացվել, որ ժամը 22.00-ին Քրիստինե Իսկանդարյանը, գիտակցության չգալով, մահացել է: Նշանակվել է դատաբժշկական փորձաքննություն: Կատարվում է քննություն: