Նվերը Չինաստանից,գումարը՝մեր պահուստային ֆոնդից

Առողջապահության նախարարությանը կառավարության պահուստային ֆոնդից հատկացվեց 3,22 մլն դրամ՝ առողջապահության նախարարության «Մարդասիրական օգնության հանրապետական կենտրոնի» կողմից, Չինաստանի կողմից Կառավարությանն անհատույց տրամադրված շտապ օգնության ռեանիմոբիլների, շտապ օգնության գծային մեքենաների, դրանց օժանդակ սարքավորումների եւ պահեստամասերի ընդունման, տեղափոխման եւ բաշխման հետ կապված ծախսերը փոխհատուցելու նպատակով:Նման որոշում կայացվեց կառավարության այսօրվա նիստում: Սույն որոշման ընդունումը պայմանավորված է այս տարվա մարտի 22-ին, առողջապահության նախարարության եւ Չինաստանի առեւտրի նախարարության միջեւ ստորագրված Համաձայնագրով: Մասնավորապես` համաձայն նշված Համաձայնագրի` չինական կողմը Հայաստանին անհատույց հիմունքներով նախատեսում է տրամադրել 200 շտապ բժշկական օգնության ավտոմեքենա: Սույն որոշմամբ նախատեսվում է փոխհատուցել նշված ավտոմեքենաները մաքսային պահեստից պահպանման վայր տեղափոխելու համար անհրաժեշտ վառելիքի, ինչպես նաեւ Չինական պատվիրակության ընդունման համար նախատեսված ծախսերը: Վերաբաշխման ենթակա 3,22 մլն դրամ գումարը նախատեսվում է ծախսել Հայաստանի Հանրապետությանն անհատույց տրամադրված 200 շտապ օգնության ավտոմեքենաները մաքսային պահեստից պահպանման վայր տեղափոխելու համար անհրաժեշտ վառելիքի, ինչպես նաեւ Չինական պատվիրակության ընդունման համար նախատեսված ծախսերի ֆինանսավորման նպատակով: