Իրավիճակի սրման միտումներ են նկատվում Բալկաններում. քաղաքական վերլուծաբան

«Իրավիճակի սրման միտումներ են նկատվում Բալկաններում: Մասնավորապես, Բոսնիա են մուտք գործել ՆԱՏՕ լրացուցիչ ուժեր, այն լարվածության ֆոնին, որ առաջանում է Բոսնիայի կազմում գտնվող Սերբական Հանրապետություն սահմանադրա-իրավական տարածքի շուրջ»,-գրում է քաղաքական վերլուծաբան Հակոբ Բադալյանը։

Նա նշում է, որ խոսքը Սերբական Հանրապետության նախագահ Միլորադ Դոդիկի հնարավոր ձերբակալության մասին է:

«Դատարանը օրեր առաջ նրան դատապարտել է մեկ տարի ազատազրկման, միջազգային կարգավորողի հրահանգները չկատարելու համար: Սերբական Հանրապետությունը Բոսնիայի տարածքում լինելով սահմանադրա-իրավական տարածք, որ ձևավորվել է Բալկաններում 1992-95 պատերազմից հետո, ենթակա է միջազգային կարգավորումների: Դոդիկը սակայն քայլեր է ձեռնարկում Սերբական Հանրապետության տարածքում Բոսնիայի կենտրոնական իշխանության ազդեցությունը սահմանափակելու համար:

Այս իրավիճակի ֆոնին թերևս ուշագրավ է այն, որ ըստ տեղեկության, Միլորադ Դոդիկը ստացել էր ԱՄՆ նախագահ Թրամպի երդմնակալությանը մասնակցելու հրավեր, սակայն չէր մեկնել, քանի որ Բոսնիայում ԱՄՆ դեսպանատունը չէր տվել վիզա:

Երկու օր առաջ Թրամպի հյուրն էր ՆԱՏՕ գլխավոր քարտուղար Ռյուտեն: Ենթադրվում է, որ զրույցը կարող էր լինել բարդ, հաշվի առնելով Թրամպի մոտեցումները ՆԱՏՕ հարցում, եվրոպական անվտանգության հարցում:

Բալկաններում Թրա՞մպն է գնում իրավիճակը լարելու միջոցով Եվրոպայի ու ՆԱՏՕ այսպես ասած եվրոպական մասի վրա ճնշում առաջացնելու ճանապարհով, թե՞ հակառակը»,-գրել է նա։