Մարզպետի « խստագույն» ցուցումներից հետո միջպետական ճանապարհին գարշահոտը չի վերացել
Իջեւանի համայնքի Լուսաձոր գյուղի կողքով, միջպետական ավտոճանապարհով երթեւեկողները զգում են ծանր հոտ, որը Լուսաձորի անասնապահական ֆերմայի եւ նույն տարածքում առկա պանրագործարանի գործունեության հետեւանք է։ Այդ գարշահոտի վերաբերյալ 12 տարի շարունակ բազմաթիվ բողոքներ եմ ստացել Տավուշի մարզի բնակիչներից, բազմիցս բարձրացրել եմ այդ խնդիրը, սակայն հարցը չի լուծվում: «ՀիմնաՏավուշ» զարգացման հիմնադրամի Լուսաձորի ֆերման ստեղծվել է 2012թ.-ին՝ Տավուշի մարզի եւ Ֆրանսիայի Օ-դե-Սեն դեպարտամենտի միջեւ ապակենտրոն համագործակցության շրջանակներում: 2016թ․-ի ամռանը Լուսաձորում ոչնչացրել, հորել են Լուսաձորի պանրագործարանում արտադրված 3.5 տոննա պանիրը: Տավուշի մարզպետ Հայկ Ղալումյանին տեղեկատվական հարցում եմ ուղարկել, հարցնելով, թե Տավուշի մարզպետարարանն ի՞նչ միջոցներ է ձեռնարկել այդ գարշահոտությունը վերացնելու համար; Մարզպետը ոչ այնքան գրագետ շարադրանքով պատասխանել է․« «ՀիմնաՏավուշ» զարգացման հիմնադրամի Լուսաձորի անասնաֆերմայի և պանրագործարանի գործունեության հետևանքով առաջացած գարշաահոտությունը կանխելու հարցին տեղեկացնում եմ, որ հիմնադրամը որևէ ենթակայություն չունի մարզպետի աշխատակազմի, և այն հանդիսանում է մասնավոր ընկերություն, սակայն մեր կողմից բազմաթիվ այցելությունների ժամանակ եղել են խստագույն ցուցումներ, որպեսզի ընկերությունը կիրառի համապատասխան միջոցներ գարշաահոտությունը չեզոքացնելու համար»։
Ոսկան Սարգսյանի գրառումը