Երևանի դատարանի նախկին նախագահ Արթուր Մկրտչյանին նախ աքսորեցին Սյունիք, հետո գործուղեցին Երեւան. Նրան մի քանի ամիս է մնացել թոշակի գնալու համար
Երևանի ընդհանուր իրավասության դատարանի նախկին նախագահ Արթուր Պետիկի Մկրտչյանը նշանակվել է Սյունիքի մարզի ընդհանուր իրավասության դատարանի դատավոր, բայց կշարունակի մնալ Երևանում։ ԲԴԽ-ն նրան կրկին գործուղել է Երևանի քրեական դատարան՝ թերեւս քննելու և ավարտելու իր վարույթում քննվող գործերը։
«Փաստինֆո»-ն արդեն տեղեկացրել է, որ ԲԴԽ որոշման համաձայն՝ ՀՀ նախագահին էր առաջարկվել Արթուր Մկրտչյանի թեկնածությունը՝ Սյունիքի մարզի առաջին ատյանի ընդհանուր իրավասության դատարանի դատավորի պաշտոնում։ Նույն որոշմամբ Երևանի ընդհանուր իրավասության դատարանի դատավորի պաշտոնում առաջարկվել է Սյունիքի մարզի ընդհանուր իրավասության դատարանի դատավոր Վահե Ջիլավյանի թեկնածությունը։ Ըստ ԲԴԽ որոշման՝ դատավորներն իրենք են ներկայացրել փոխանակման դիմումները։
Թե ինչու էր Երեւանի դատարանի նախկին նախագահը, իբր, կամավոր ցանկություն հայտնել աքսորվել Սյունիք ու հետո էլ ցանկություն հայտնել Երեւան գործուղվել՝ որպես մարզի դատավոր, հայտնի չէ, սակայն փաստն այն է, որ ՀՀ նախագահ Վահագն Խաչատուրյանն արդեն ստորագրել է հրամանագրերը և, ըստ այդմ, Վահե Ջիլավյանը նշանակվել է Երևանի քրեական դատարանի դատավոր, Արթուր Մկրտչյանը՝ Սյունիքի մարզի դատարանի։
Հատկանշական է, սակայն, որ Արթուր Մկրտչյանի 65-ամյակն ընդամենը մի քանի ամսից լրանում է և վերջինս պետք է հունիսին թոշակի անցնի, ուստի, հետաքրքիր է, թե ինչու է բարձրացվել՝ առհասարակ այլ դատարան տեղափոխվելու հարց։
Ի դեպ, Մկրտչյանի վարույթում այս պահին գտնվում է ՊԵԿ նախկին նախագահ Գագիկ Խաչատրյանի վերաբերյալ քրեական գործը, որը, թեև դատաքննության ավարտական փուլում է, սակայն պարբերաբար ձգձգվում է՝ պայմանավորված Խաչատրյանի առողջական խնդիրների և այդ հիմքով նրա բացակայության հետ։ Այս գործը Դատական դեպարտամենտի կողմից առանձնացվել և դասվել էր այն աղմկահարույց գործերին, որոնցով դատավարությունը ձգձգվում է, սակայն, ի տարբերություն այլ գործերով՝ ԴԴ տեսանյութում Արթուր Մկրտչյանն առանձնապես թիրախավորված չի եղել։