Այլ երկրների ներկայությունը խոչընդոտում է Հարավային Կովկասում խնդիրների կարգավորմանը. Իրանի դեսպան

«3+3» խորհրդատվական հարթակի հաջորդ հանդիպումը կարող է տեղի ունենալ այս տարի ևս, ասել է Ռուսաստանում Իրանի դեսպան Քազեմ Ջալալին՝ պատասխանելով NEWS.ru-ի թղթակցի հարցին։ Դիվանագետը հույս է հայտնել, որ Վրաստանը կդառնա դրա մասնակիցը։ (Թեհրանում կայացած հանդիպմանը Վրաստանը հրաժարվել էր մասնակցել/ խմբ.)։

«Տարածաշրջանում խնդիրների լուծման ամենաօգտակար ձևաչափը «3+3»-ն է։ Հուսով եմ, որ այս տարի կրկին նոր հանդիպում կանցկացվի»,- ասել է Ջալալին։

Իրանի դեսպանը հիշեցրել է, որ այս ձևաչափով նախորդ հանդիպումը անցկացվել է Թեհրանում անցած տարի։

Ջալալին այն անվանել է հաջողված։ Նա հավելել է, որ այլ պետությունների, «գերտերությունների» միջամտությունը ոչ միայն սրում է իրավիճակը, այլ նաև ուժեղացնում է էսկալացիան Հարավային Կովկասում։

«Հարավային Կովկասում կարգավորմանը խանգարում է այլ երկրների առկայությունը։ Այս տարածաշրջանի վեց երկրները՝ Ռուսաստանը, Թուրքիան, Իրանը, Ադրբեջանը, Հայաստանը և Վրաստանն են այս տարածաշրջանի լավագույն փորձագետները, և ոչ թե որոշ այլ երկրներ»՝ վստահ է Ջալալին։