Արման Բաբաջանյանի գույքի և եկամուտների օրինականությունն ուսումնասիրվո՞ւմ է դատախազությունում

Դատախազությունն ուղիղ պատասխան չունի՝ «Հանուն Հանրապետության» կուսակցության, «1-ին.am» լրատվական կայքի հիմնադիր Արման Բաբաջանյանի գույքի և եկամուտների օրինականությունն ուսումնասիրվել է, թե՝ ոչ. փոխարենն ասում են՝ տվյալները գաղտնի են։

Այսպես, 2025թ․ ապրիլին «Փաստինֆո»-ն հրապարակել էր «Արման Բաբաջանյանը 1.5 մլն դոլարանոց տուն է գնել ԱՄՆ-ում՝ փոխկապակցված անձի անվամբ, սակայն նրա գլխավորած կուսակցությունը ոչինչ չի հայտարարագրել, իսկ որտե՞ղ է դատախազությունը» վերտառությամբ հոդվածը, որտեղ նշվում է, որ Արման Բաբաջանյանի հետ՝ ինչպես դատախազությունն է սիրում օգտագործել՝ «փոխկապակցված անձը», այն է՝ քույրը, Գլենդելում շուրջ 1,5 մլն դոլարանոց տուն է գնել։ Միաժամանակ նկատել էինք, որ Բաբաջանյանի կուսակցությունը Գյումրիում տեղի ունեցած ՏԻՄ ընտրություններում «Եվրադաշինքի» կազմում աջակցում էր առաջադրված թեկնածու Լևոն Բարսեղյանին և ներկայացրած հայտարարագրի համաձայն՝ ունի 0 լումա։ Ավելի ուշ հրապարակել էինք նաև նյութը հիմնավորող փաստաթղթերը՝ տան լուսանկարը և թե որքան գումար է վճարվել դրա համար։

«Փաստինֆո»-ն գրավոր հարցմամբ դիմել է ՀՀ գլխավոր դատախազությանը՝ պարզելու, թե արդյոք ապօրինի ծագում ունեցող գույքի բռնագանձման կամ ապօրինի հարստացման շրջանակներում ուսումնասիրվում են Արման Բաբաջանյանի գույքն ու եկամուտները, արդյո՞ք քրեական վարույթ նախաձեռնվել է նշված դեպքով, եթե այո, ապա երբ, ինչ հատկանիշներով և ինչ կարգավիճակ ունի Արման Բաբաջանյանը։ Ի վերջո, նախկին պատգամավորի քույրը թանկարժեք տունը գնել է Արման Բաբաջանյանի՝ ՀՀ ներկայիս իշխանության հետ քաղաքական համագործակցությունն սկսելուց հետո։

Դատախազությունից միանշանակ պատասխան չի տրվել. ըստ էության՝ չի հերքվել, որ նման ուսումնասիրություն առնվազն կարող էր իրականացվել։ Մասնավորապես, դատախազությունից նշել են, որ տեղեկատվություն հնարավոր չէ տրամադրել՝ «Ապօրինի ծագում ունեցող գույքի բռնագանձման մասին» օրենքի 9-րդ հոդվածի իրավակարգավորումներով։

Նշենք, որ «Ապօրինի ծագում ունեցող գույքի բռնագանձման մասին» օրենքի 9-րդ հոդվածի համաձայն՝ ուսումնասիրություն սկսելու հանգամանքը, դրա հիմքերը, դրա ընթացքի վերաբերյալ և դրա արդյունքում ստացված տվյալները գաղտնի են, ենթակա են տրամադրման շահագրգիռ անձանց միայն սույն օրենքով նախատեսված կարգով, իսկ այլ անձանց՝ բացառապես իրավասու մարմնի համաձայնությամբ՝ ելնելով ապօրինի ծագում ունեցող գույքի բռնագանձման վարույթի նպատակներից։ Իրավասու մարմինը նախազգուշացնում է շահագրգիռ անձանց, նրանց ներկայացուցիչներին, փորձագետներին, մասնագետներին, թարգմանիչներին և այլ ներգրավված անձանց ուսումնասիրության արդյունքներով ստացված տվյալներն առանց թույլտվության չհրապարակելու պարտականության և համապատասխան պարտականությունը խախտելու համար օրենքով նախատեսված պատասխանատվության մասին։

Այլ խոսքով՝ դատախազությունից չեն նշել, որ նման ուսումնասիրություն չի իրականացվել, փոխարենը նշել են գաղտնիության ռեժիմի մասին։

Հեղինակ՝ Իզաբել Սահակյան

Հ. Գ. Նշենք, որ Ա. Բաբաջանյանը հայցադիմում էր ներկայացրել ընդդեմ «Փաստինֆո»-ի, որը քննվել է պարզեցված ընթացակարգով՝ առանց «Փաստինֆո»-ի մասնակցության։