Երեւանի քաղաքապետարանը երեք կապալառուների պատվիրակել է հանրային միջոցառումների կազմակերպումը՝ 4 տարբեր նպատակներով

Երևանի քաղաքապետարանը 4 միջոցառումների իրականացման համար ծախսել է 1 միլիոն 875 հազար 554 դրամ։ Այս մասին «Փաստինֆո»-ն տեղեկանում է պաշտոնական բաց աղբյուրներում հրապարակված փոստաթղթերից։

Պայմանագրեր են կնքվել 3 կապալառուների՝ «Արմեն Գևորգյան Սամվելի» անհատ ձեռնարկատիրոջ, «Նեդ գրուպ» ՍՊ ընկերության և «Դիանա Արեգի Մնացականյան» անհատ ձեռնակատիրոջ հետ։

Նշված գումարից 500 հազար դրամը ծախսվել է Դավթաշեն վարչական շրջանում գործող Սրբոց Նահակաց եկեղեցու բակում Սուրբ Հարության տոնին նվիրված միջոցառման կազմակերպման համար։ Պայմանագրից տեղեկանում ենք, որ կապալառուն պարտավորվել է եկեղեցու բակում ապահովել տոնին համահունչ ձևավորում։ Հավելենք նաև, որ բացի ձևավորումից կատարողը նաև պարտավորվել է կազմակերպել հյուրասիրություն թվով 100 անձի համար, ինչը ներառել է 100 հատ ներկված հավկիթ, 5 մեծ չափաբաժին բրնձով և չամչով փլավ, տապակած բանջարեղեն, 20 հատ մեծ կլոր գաթա, 5 տուփ հալվա, 3 շիշ կիսաքաղցր գինի և այլն։

Հաջորդ միջոցառումը, որի համար տրամադրվել է 440 հազար դրամ ծիծաղի միջազգային օրվա հետ կապված միջոցառումն է եղել։ Արցախյան 44-օրյա պատերազմում զոհված զինծառայողների ընտանիքների 30 երեխայի և 2 ուղեկցողի համար կազմակերպվել է այցելություն կրկես։
Հաջորդիվ գումար է ծախսվել ընտանիքի միջազգային օրվան նվիրված միջոցառման կազմակերպման համար, որը նշվում է մայիսի 15-ին, տրամադրվել է 467.777 դրամ։ Եւս 467.777 դրամ էլ հատկացվել է կանանց միջազգային օրվա հետ կապված միջոցառման իրականացման համար։