Աշխարհում զինված հակամարտությունների թիվը քառապատկվել է. ԿԽՄԿ

Աշխարհում զինված հակամարտությունների թիվը 30 տարվա ընթացքում աճել է չորս անգամ։ Այս մասին հայտարարել է Կարմիր խաչի միջազգային կոմիտեի (ԿԽՄԿ) նախագահ Միրյանա Սպոլյարիչ-Էգերը։

«Այսօր աշխարհում մենք երկու անգամ ավելի շատ հակամարտություն ենք հաշվում, քան 15 տարի առաջ, և 4 անգամ ավելի շատ, քան 30 տարի առաջ։ Սակայն խնդիրը միայն դրանց թիվը չէ, այլև ինտենսիվությունն ու մասշտաբը. այն փաստը, որ հակամարտությունները համընկնում են տեխնոլոգիական արագ զարգացման հետ, մեծացնում է բացասական ազդեցությունը երկրների բնակչության վրա։ Դրանք արագացնում են բնակչության տեղահանումը։ ԱԹՍ-ները չեն պատերազմում դրոնների դեմ, դրանք կռվում են զինվորականների դեմ և ավելի ու ավելի հաճախ են թիրախավորում բնակչությանը։ Պատերազմները վերածվում են պատերազմների ոչ թե զենք կրողների, այլ խաղաղ բնակիչների դեմ։ Եվ սա միջազգային հումանիտար իրավունքի քայքայման հետևանքն է»,- ասել է նա Մյունխենի անվտանգության համաժողովում։

Նրա խոսքով՝ մարդասիրական ծրագրերի ֆինանսավորման ճգնաժամը ոչ թե ֆինանսական, այլ քաղաքական խնդիր է։
«2023 թվականից ի վեր մենք կրճատել ենք հազարավոր աշխատակիցների, մասշտաբային վերակազմավորումներ ենք արել, բյուջեն կրճատել ենք 1 միլիարդ դոլարով, բարեփոխել ենք ֆինանսական կառավարումը։ Սա քաղաքական խնդիր է։ Իրավունքի գերակայությունը հնարավոր է միայն այն դեպքում, երբ կա այն հարգելու քաղաքական կամք և միջազգային համաձայնագրեր։ Միայն եթե երկրների ղեկավարներն օրենքները դարձնեն իրենց քաղաքական առաջնահերթությունը, միայն այդ ժամանակ մենք կկարողանանք կրճատել հակամարտությունների թիվն ու մասշտաբը, և դա կնվազեցնի անհրաժեշտ մարդասիրական օգնության արժողությունը»,-նշել է ԿԽՄԿ ղեկավարը։

Ավելի վաղ ԿԽՄԿ-ն իր տարեկան հաշվետվության մեջ հայտնել էր, որ աշխարհում զինված հակամարտությունների թիվը շարունակում է աճել՝ 2024 թվականին հասնելով շուրջ 130-ի։ Ավելի քան 20 հակամարտություն տևում է ավելի քան երկու տասնամյակ։