Նման փաստ չկա, որ եկեղեցին որևէ սրբավայր կամ հուշարձան օտարել է կամ կարող է օտարել. Տեր Եսայի

Պնդումը, թե հնարավոր է՝ Եկեղեցին որևէ սրբավայր կամ հուշարձան օտարի, և դա է իբրև հիմնավորում ներկայացվում այդ օրինագծին, ամբողջովին անհիմն է, որովհետև երբևէ նման փաստ գոյություն չունի, որ եկեղեցին որևէ սրբավայր կամ հուշարձան օտարել է կամ կարող է օտարել։ Այս մասին, այսօր՝ հունվարի 9–ին, NEWS.am–ի հետ զրույցում նշեց Մայր աթոռի տեղեկատվական համակարգի տնօրեն Տեր Եսայի քահանա Արթենյանը՝ անդրադառնալով ՔՊ–ականների ներկայացրած օրինագիծին, որով առաջարկվում է, որ հուշարձանների պետական ցանկերում ներառված պաշտամունքային կառույցները հնարավոր կլինի ցանկացած երրորդ անձի հատուցմամբ կամ անհատույց օտարել բացառապես Կառավարության համաձայնության դեպքում:

«Բոլոր մեր սրբավայրերը մեր ժողովրդի հոգևոր կարիքների համար են միայն և ուրիշ նպատակի կամ ուրիշ ծառայության համար դրանք կիրառվել չեն կարող»,–ասաց նա։

Հարցին՝ այդ դեպքում ո՞րն է նման օրինագծի նպատակը, ի՞նչ են փորձում անել դրանով, Տեր Եսային պատասխանեց. «Իրականում ինքը ոչ մի գործնական նշանակություն չունի, բայց որևէ այլ գնահատական կդժվարանամ այս պահին տալ»։

Ինչ վերաբերում է նրան, որ գուցե դրանով փորձում են կանխել օրինակ, Սուրբ Գեղարդից մասունք Ռուս եկեղեցուն նվիրելու դեպքերը, նա արձագանքեց. «Եկեղեցում որևէ մասունք կամ որևէ սրբություն ինչ-որ մեկին կամ որևէ եկեղեցու նվիրելու համար կա հստակ ընթացակարգ, որևէ բան գաղտնի չի արվում։ Եթե նման բան արվում է, դա կատարվում է հստակ ընթացակարգով։ Իսկ թե օրենսդրական ինչ նախաձեռնություններ կլինեն գուշակել չեմ կարող»։

Հիշեցնենք, որ «Քաղաքացիական պայմանագիր» խմբակցության պատգամավորներ Սիսակ Գաբրիելյանը և Թագուհի Ղազարյանն առաջարկում են փոփոխել «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքի 37-րդ հոդվածը: Ըստ այդմ՝ հուշարձանների պետական ցանկերում ներառված պաշտամունքային կառույցները հնարավոր կլինի ցանկացած երրորդ անձի հատուցմամբ կամ անհատույց օտարել բացառապես Կառավարության համաձայնության դեպքում: