Ռուբեն Վարդանյանը անձնական բարեկեցությունը ստորադասեց հայրենիքի շահին․ Թանդիլյանը՝ Փաշինյանին

«Ապրելու երկիր» կուսակցության համահիմնադիր Մանե Թանդիլյանը գրում է․

«Նիկոլ Փաշինյանը օրեր առաջ հայտարարեց, որ Սփյուռքի մեր հայրենակիցները, այդ թվում՝ Ռուբեն Վարդանյանը, Հայաստանում ներդրումներ են կատարել բացառապես տնտեսական հետաքրքրությունից ելնելով։

Սակայն փաստերն այլ բան են վկայում.

Ռուբեն Վարդանյանը՝ իր ընտանիքի և ընկերների հետ, Հայաստանում և հայկական աշխարհում իրականացրել է ավելի քան 700 միլիոն դոլարի ներդրում. Դրա ճնշող մեծամասնությունը բիզնես բնույթ ՉՈւՆԻ։

Այս ներդրումները վաղուց արդեն Հայաստանինն են և հայ ժողովրդինն են՝ հիմնված ոչ թե շահույթի, այլ հայրենասիրության և պատասխանատվության վրա։

Դրանցից միայն մի քանիսը՝

Դիլիջանի միջազգային դպրոցը՝ Հայաստանում միջազգային չափանիշներին համապատասխանող եզակի կրթական կենտրոն, որտեղ կրթություն են ստանում երեխաներ աշխարհի տարբեր երկրներից։

Տաթևի ճոպանուղին՝ Հայաստանի միակ միջազգային մակարդակի ենթակառուցվածքը, որը արդեն մի քանի տարի շարունակ ճանաչվում է որպես աշխարհի լավագույն ճոպանուղիներից մեկը։

Սոցիալական, կրթական, մշակութային և մարդասիրական մյուս ծրագրերի ցանկը կարելի է երկար շարունակել․ բոլորն իրականացվել են առանց որևէ տնտեսական հետաքրքրության։

Մարդիկ, ովքեր սեփական գործողություններում առաջնորդվում են բացառապես անձնական շահերով, պարզապես չեն կարող պատկերացնել, որ գոյություն ունեն մարդիկ, ովքեր իրենց անձնական և ընտանեկան բարեկեցությունը ստորադասում են հայրենիքի շահին։

Ռուբեն Վարդանյանը մեր ժամանակների այդպիսի մարդու ամենավառ օրինակներից է։

Հ.Գ. Թվերից գլուխ չհանող իշխանությունների համար հավելեմ․

700 միլիոն դոլարի ներդրումը ավելին է, քան վերջին 35 տարիների ընթացքում ԱՄՆ-ի և Ֆրանսիայի կողմից Հայաստանում իրականացված օտարերկրյա ուղղակի ներդրումները միասին վերցրած»։