Ռուբեն վարդապետ Զարգարյանն այս պահին Մասյացոտն թեմում չէ․ Ո՞ւմից են ոստիկանները փորձում պաշտոնազրկված Գեւորգ Սրբազանին պաշտպանել

Չնայած Մասյացոտն թեմի առաջնորդանիստ Սուրբ Թադեոս եկեղեցին այս պահին շրջափակված է ոստիկանական մեծաթիվ ուժերով, ինչպես նաև ՔՊ-ական ագրեսիվ տրամադրված ակտիվիստներով, սակայն, «Փաստինֆո»-ի տեղեկություններով, թեմում տեղապահ նշանակված Ռուբեն վարդապետ Զարգարյանը այս պահին թեմում չէ։

Ինչպես արդեն հայտնել ենք՝ Մասյացոտնի թեմի առաջնորդ Գերշ․ Տ․ Գևորգ եպիսկոպոս Սարոյանը ազատվել է թեմակալ առաջնորդի պաշտոնից եւ տեղապահ է նշանակվել Ռուբեն վարդապետը։ Առաջին հայացքից կարող է անհասկանալի թվալ, թե ինչով է պայմանավորված մեծաքանակ ոստիկանական ուժերի կենտրոնացումը եկեղեցու շուրջ, առավել ևս անհասկանալի է, թե ինչու են հենց այս եկեղեցում ոստիկանները որոշել հասարակական կարգ ապահովել եւ ումից են այդ կարգը պաշտպանում, սակայն հիշենք, որ վաղը կիրակի է, իսկ Նիկոլ Փաշինյանը հայտարարել է, որ այսուհետ բոլոր կիրակի օրերին մասնակցելու է պատարագների ու մինչ այս պահը դեռ չի հայտարարել, թե վաղը հատկապես որ եկեղեցում է լինելու։

Բացի այդ՝ Նիկոլ Փաշինյանը, գերազանցելով իր լիազորությունները, հայտարարել է, որ չի ընդունում տիրադավ Գեւորգ Սրբազանին պաշտոնանկ անելու որոշումը ու բացառված չէ, որ ոստիկանների հսկողության ներքո նաեւ փոխվեն առաջնորդանիստ եկեղեցու փականները, ինչպես Հովհաննավանքում ու զբաղվեն ինքնիրավչությամբ։