Թույլ չտրվեց, որ քահանան պատարագ մատուցի. Փառք Աստծո, որևէ մեկի քթից արյուն չհոսեց. Տեր Փառեն

Մեր եկեղեցու ավանդույթի համաձայն, տաղավար տոներին եկեղեցում պետք է պատարագ մատուցի եկեղեցու հոգևոր հովիվը, սակայն դա, ըստ էության, խոչընդոտվեց, տեղի չունեցավ։ Այս մասին NEWS.am–ի հետ զրույցում նշեց Սաղմոսավանքի հոգևոր հովիվ Տեր Փառեն քահանա Առաքելյանը՝ անդրադառնալով Թալինի Սուրբ Աստվածածին եկեղեցում տեղի ունեցածին։

«Արի ու տես, որ ներսում արդեն զգեստավորված, կարգալույծ եղած քահանան արդեն սպասում էր, որ արարողություն կատարի։

Իսկ մեր առաքելությունը, ինչպես միշտ այն է, որ բացի այն, որ մեր եկեղեցու պատիվը բարձր պահենք, Աստծուն ծառայենք, առաջին հերթին մեր կյանքից ներս Աստծուն դնենք, նաև թույլ չտանք, որպեսզի որևէ մեկի քթից արյուն հոսի։ Փառք Աստծո, դա մեզ հաջողվեց։ Մենք տեսանք, որ այնտեղ սադրանք կար, մարդիկ տեսել են, թող դատեն։

Մենք ունենք մի մեծ առավելություն, որ ժողովուրդը հոգևորականի խոսքը չի անտեսում։

Բայց տեղի ունեցավ այն, ինչը չպիտի լիներ, որովհետեւ կարգալույծ եղած անձը չպետք է արարողություն կատարի և մարդկանց գայթակղության քար հանդիսանա։ Թող Աստված դատի, թող բարին լինի»,–ասաց նա։

Նա հայտարարեց, որ շատ թալինցիներ եկել են Մաստարայի Սուրբ Հովհաննես Մկրտիչ եկեղեցի, որպեսզի մասնակցեն պատարագի. «Մենք մշտապես ասել ենք, որ պատասխանատու ենք այն ժողովրդի համար, որոնք ստիպված այսօր իրենց բնակավայրից եկան և պատարագի են մասնակցում։ Դա ճիշտ չէ, մարդը իրավունք ունի իր բնակավայրում մուտք գործելու եկեղեցի և սուրբ պատարագի մասնակցելու, բայց մարդիկ այստեղ են, որովհետեւ չեն ուզում ապօրինի արարողության մասնակցել։

Պատարագի մասնակցել, նշանակում է, որ պետք է լինի օծված հոգևորական, ոչ կարգալույծ եղած հոգևորական։ Դրա համար վերջին պահին ավտոբուսներով մարդկանց բերել են այստեղ»,– ընդգծեց քահանան։

Նշենք, որ այսօր Թալինի Սուրբ Աստվածածին եկեղեցում ոստիկանները շրջափակել էին եկեղեցու մուտքը և թույլ չէին տալիս քահանային մուտք գործել եկեղեցի։ Թալինի քաղաքապետ Տավրոս Սափեյանը, ով ևս այնտեղ էր, նշեց, որ եկեղեցու այս պատարագի համար եկեղեցական ունեն. «Ամենայն հարգանքով Տեր Հայկի նկատմամբ, Հայկը չի մտնելու եկեղեցի»։

NEWS.am