Փաշինյանի զոհն է, թող 2026-ի ՔՊ ընտրությանը մասնակցի․ Տեր Վրթանեսը՝ կարգալույծ Արամայիս Թախմազյանին

Մայր Աթոռից այսօր՝ դեկտեմբերի 3-ին, հայտնեցին, որ դեկտեմբերի 2-ին կարգալույծ է հռչակվել Արագածոտնի թեմի Թալինի տարածաշրջանի հոգևոր հովիվ Տ․ Թադե քահանա Թախմազյանը, որը հետ այսու կկոչվի՝ Արամայիս Թախմազյան։

Երբ Մայր Աթոռը կարգալույծ է հռչակում որևէ հոգևորականի, այսինքն՝ էլ ոչ մի հնարավորություն չունի պահելու։ 24News-ի հետ զրույցում նման կարծիք հայտնեց Բյուրականի Սուրբ Հովհաննես եկեղեցու հոգևոր հովիվ Տեր Վրթանես քահանա Բաղալյանը։

«Այսօր թեմում մենք քահանաների սղություն ունենք, մեծ պակաս ունենք, բայց Արամայիս Թախմազյանն անուղղելի էր։ Ինքը ոչ միայն Վեհափառ Հայրապետի, առաջնորդի անունը չէր տվել, այլև այդպես էլ շարունակել էր։ Քանի որ շարունակական եղավ, այլևս անհնար էր իրեն պահել, եթե քահանան ինքնագլուխ նման պատարագ կարող է անել, ապա նման հակաեկեղեցական քահանա հնարավոր չէ ունենալ եկեղեցում։ Ցավոք սրտի, բոլոր միջոցներն անօգուտ եղան իրեն դեպի Մայր եկեղեցի վերադարձնելու։ Թող գնա, 2026 թվականի ՔՊ-ի ընտրություններին իր մասնակցությունը բերի»,-ասաց Տեր Վրթանեսը։

Նա ասաց, որ այս ընթացքում գնացել են Թալին, ժամերգություն են արել, սակայն նախկին հոգևորականը չի էլ մասնակցել։

«Այսինքն՝ ինքն իրեն արդեն Թեմից դուրս էր դրել։ Մայր Աթոռի այսօրվա հայտարարությունն արդեն իսկ տեղի ունեցած իրողության փաստագրումն էր։ Ինքը Նիկոլ Փաշինյանի հերթական զոհերից է։ Սիրված, հարգված քահանա էր, ընկավ այս հակաեկեղեցական շարժման թակարդը և արդյունքում կորցրեց ժողովրդի սերն ու հարգանքը, ինչպես նաև իր հոգևոր եղբայրների։ Ինքը Ստեփան Ասատրյանի նման սուտ, զրպարտիչ տեղեկություններով, անպատասխանատու հայտարարություններով, անլուրջ կեցվածքով այլևս եկեղեցու ներսում չէր կարող լինել։ Իր ներկայությունը խոցելի էր դարձնում եկեղեցին։ Բարեպաշտ ժողովուրդը, հոգևոր դասը պահանջում էին, որ նման ուխտադրուժ կեցվածք ունեցողները եկեղեցում տեղ չգտնեն։ Ցավալի վիճակ է, սրտանց ցավում եմ։ Նույնիսկ առաջին կուրսի ճեմարանականը երբ դուրս է մնում, մենք նեղվում ենք դրա համար»,-ասաց Տեր Վրթանեսը։

Նրա խոսքով, մինչև հակաեկեղեցական արշավը Թեմում սիրով ծառայել են նախկին հոգևորականի հետ, կոնֆլիկտեր չեն ունեցել մինչև այն պահը, երբ Ստեփան Ասատրյանը հակաեկեղեցական կեցվածք ցուցաբերեց։

«Ինքը շատ արագ, մի քանի օրվա մեջ ընկավ այդ ցանցը։ Պատկերացրեք՝ Թալինի շրջանում գործող 10 եկեղեցիներից 8-ը ինքն էր սպասարկում, 2-ը՝ Տեր Հայկը։ Այսինքն՝ նույնիսկ ավելի արտոնյալ էր, այդ տարածաշրջանը բավականին մեծ է։ Հետո շատ անակնկալ տեսնում ենք սա։ Ցավալի է, որ երկար տարիներ եկեղեցում ծառայող մարդիկ կարող են մի օր ուրանալ իրենց հավատքը, Եկեղեցին, դուրս գան Մայր Աթոռ Սուրբ Էջմիածնի, Վեհափառ Հայրապետի, Եկեղեցու նվիրապետության դեմ»,-ասաց Տեր Վրթանես քահանա Բաղալյանը։

Հասմիկ Սարգսյան