Կառավարության կողմից ԼՂ բանակցային գործընթացի վերաբերյալ հրապարակված փաստաթղթերի փաթեթը ամբողջական չէ. Արթուր Խաչատրյան

Կառավարության կողմից ԼՂ բանակցային գործընթացի վերաբերյալ հրապարակված փաստաթղթերի փաթեթը ամբողջական չէ, էական մի հատված դուրս է մնացել, եթե կառավարությունը պատշաճ կերպով դիմի, կարող եմ խորհրդատվություն տրամադրել։ Այս մասին, այսօր՝ դեկտեմբերի 3–ին, ԱԺ–ում լրագրողների հետ զրույցում նշեց ԱԺ «Հայաստան» խմբակցության պատգամավոր Արթուր Խաչատրյանը։

«Օրինակ, նորացված Մադրիդյան սկզբունքների մասին խոսք չի եղել։ Օրինակ, իրանական առաջարկի մասին, ԵԱՀԽ, Մինսկի խորհրդաժողովի առաջարկների մասին չկա։ Փաստաթղթերի ցանկի մեջ հայտնվել էր մի թղթի կտոր, որը չես կարող կոչել փաստաթուղթ։ Ի՞նչ է նշանակում սեփական թերթի հոդվածի վրա հղում կատարել և դա ներկայացնել որպես փաստաթուղթ, սա նշանակում է, որ իրենք կամ չունենք Քի Վեստի փաստաթուղթը, ինչը ողջամիտ չէ, որովհետև նույնիսկ եթե օրիգինալը գնալուց առաջ նախկին նախարարներից ինչ-որ մեկը պատռել և գցել է, միևնույն է, Նիկոլ Փաշինյանը 2018 թվականի մայիսից վարչապետ է եղել, ինքը կարող էր ամերիկյան կողմից, ֆրանսիական կողմից, ռուսական կողմից, ԵԱՀԿ Մինսկի խմբից, ԵԱՀԿ նախագահությունից ստանալ դրա պատճենը։

Այսինքն, ինքը կամ ջանք չի գործադրել ստանալու համար, կամ ստացել է, և այդ դեպքում ինչու՞ չի հրապարակում։ Չի հրապարակում, որովհետև ակնհայտ է, որ դա այն չէ, ինչը իրենք շեփորահարում էին, կամ էլ իրոք չունեն։ Բայց եթե չունեն, այդ դեպքում ի՞նչն են քննադատում»,–ասաց նա։