«88»-ն արմատներ է գցել նաեւ Սյունիքի խոշոր քաղաքներում

 «Հրապարակ օրաթերթը» գրում է. «Ծիրան» եւ «88» սուպերմարկետների սեփականատեր, նորահայտ օլիգարխ Նարեկ Նալբանդյանը շարունակում է արշավանքը Հայաստանով մեկ: Նրա ձեռագիրը հայտնի է՝ նա նոր ներդրումներ չի անում առեւտրի ոլորտում, այլ վերցնում է անուն հանած, բայց ինչ-ինչ պատճառներով սնանկացած բիզնեսները կամ ստիպում է, որ գործող բիզնեսը վաճառեն իրեն: Այդպես եղավ «Ծիրան» սուպերմարկետների ցանցի, «Սան ֆուդ» բրենդի հետ, որը դարձավ «88»` կորցնելով իր անունը: «Սան ֆուդի» հաճախորդները դժգոհ են: «Ես այստեղից միայն հաց եմ գնում: Մյուս ապրանքներին մոտենալ չի լինում, այնքան են գները բարձրացել»,- ասում է «Սան ֆուդի» արդեն նախկին հաճախորդ, Շենգավիթի բնակիչ Արմինե Հ․-ն: 

«88»-ն արմատներ է գցել նաեւ Սյունիքի խոշոր քաղաքներում՝ Սիսիանում եւ Կապանում: Սյունեցիները եւս գոհ չեն: Հետաքրքիր զուգադիպությամբ, այն մարկետներում, որոնք անցնում են նորահայտ օլիգարխի ձեռքը, հարկային ստուգումներ են արվում, խախտումներ են հայտնաբերվում: Այդպես է եղել նաեւ Գորիս քաղաքում վերջին 9  տարիներին հաջողությամբ գործող «Արարատ» սուպերմարկետի հետ, որը, ըստ գորիսեցիների, բավական բարձրորակ մթերք էր վաճառում: Մինչեւ նոյեմբերի 1-ը այն դեռ «Արարատ» էր, նոյեմբերի 1-ից հետո դարձավ «88»: Դա Գորիսի ամենախոշոր ու հայտնի սուպերմարկետն էր: Ամենամեծ առեւտրի շարժն «Արարատում» էր լինում: Բնականաբար, տերերը չէին պատրաստվում վաճառել ծաղկող բիզնեսը, եւ ինչո՞ւ վաճառել այն, ինչն ահռելի եկամուտ է բերում: 
Գորիսում պատմում են, որ մոտ 1 ամիս առաջ Նարեկ Նալբանդյանն իր թիկնազորով գնացել է Գորիս եւ «Արարատի» տերերին ասել, որ ուզում է գնել սուպերմարկետը: Բայց «Արարատի» տերը պատասխանել է, որ չի պատրաստվում վաճառել խանութը: Հետո քաղաքում լուր է տարածվել, թե Նարեկը խոստացել է, որ մինչեւ դեկտեմբեր «Արարատ» սուպերմարկետն իրենը կլինի: Ապա խանութում ստուգումներ են սկսվել: Գորիսի մեր աղբյուրը պատմում է, որ «շատ պրիմիտիվ բաների համար» անընդհատ ստուգել են իրենց սիրելի սուպերմարկետը, ու տուգանքը տուգանքի հետեւից է եկել: 

«Մարդիկ էլ ասել են. ինչքա՞ն կարող ենք աշխատել՝ տուգանք վճարել: Խանութ է, էլի, ցանկության դեպքում միշտ էլ մի մանրուք կարելի է գտնել: Մե՛կ հաճախորդն է դժգոհ, մե՛կ ինչ-որ այլ առիթ կա ստուգելու: Եթե մարդուն չեն թողնում նորմալ աշխատի, ստիպված վաճառում է: Իրենք մի հատ մարկետ ունեին ու դա էլ են վաճառել»,- պատմում է մեր աղբյուրը: Պատմում են, որ Գորիսում «88»-ը վերցրել է նաեւ մի քանի մանր խանութ, որոնց դեռ «88» բրենդի անունը չեն տվել, այլ վերցրել են վարձակալությամբ: «Արարատի» նախկին հաճախորդները վրդովված են` հիմա Գորիսի Անկախության 7/22-2 հասցեում «88» սուպերմարկետ է բացվելու: 

Այս տեղեկությունները չէինք հասցրել ստուգել, երբ խմբագրությունն էլեկտրոնային նամակ ստացավ Գորիսից. «Բարեւ Ձեզ, Ձեզ գրում է Գորիսի մի բնակիչ, մի շատ վտանգավոր հարցի մասին եմ ուզում տեղեկացնել. Աննա Հակոբյանի անվան հետ կապ ունեցող «88» սուպերմարկետների ցանցը ռեկետ է իրականացնում Սյունիքում: Մարզում այլեւս խոշոր բիզնես չեն թողել: Նախ փորձում են բանակցել, հետո խոշոր ակտեր են գրում: Եթե չեն համաձայնում, կարճ ժամանակ հետո գնում են բիզնեսը: Մարզի բոլոր խոշոր խանութները գնված են: Հիմա սկսել են գնել հյուրանոցներ, ռետորաններ: Նախ, որտեղի՞ց դրանց այդ ահռելի գումարները: Հետո՝ Սյունիքում մտահոգված են, որ դրանք թուրքերի համար են, եւ շուտով սյունեցիները, իրենց կամքից անկախ, կաշխատեն թշնամու բիզնեսում»:  

Գորիսի լրագրողներից մեկը` Արմինե Սիմոնյանը, իր ֆեյսբուքյան էջում անդրադարձել է «Արարատի» փակմանը. «Քաղաքի լավագույն մարկետը բաժին ընկավ եսիմ ում, իսկ բոլորը սահմանափակվեցին ըմբոստանալ ու ցավել իրենց տներում։ Սյունեցիների բիզնեսները մեկը մյուսի հետեւից տանում են, իսկ չկա մեկը, որ սաստի, թեւ ու թիկունք դառնա, պարզի՝ ինչո՞ւ պետք է տեղաբնակը վաճառի ու հեռանա։ Ինչո՞ւ պետք է գա մի ցանց, որտեղ հայկական ապրանքներ գրեթե չկան»։

Ամիսներ առաջ «88»-ը Գորիսում կուլ է տվել նաեւ «Շանե» հայտնի մթերային խանութը, որի մի մասը ֆուդկորտ էր: Այն գործում էր Գորիսի Մաշտոցի 36 հասցեում: Հուլիսի վերջին ընկերությունը հայտարարություն տարածեց, որ շուտով կդադարեցնի գործունեությունը։ «Սակայն մեր նախաձեռնությամբ շուտով նույն տարածքում կգործի սիրված եւ ճանաչված «88» սուպերմարկետների ցանցի նոր մասնաճյուղը։ Մեր նպատակը միշտ նույնն է՝ ձեզ համար ապահովել հարմարավետ, հասանելի եւ բարձրորակ սպասարկում»,- ասվում էր «Շանե թիմ»-ի հայտարարության մեջ։
Ինչո՞ւ եք բոլորդ հաճույքով զիջում ձեր բիզնեսը Նարեկ Նալբանդյանին, ինչո՞ւ չեք ուզում շարունակել աշխատեցնել եկամտաբեր բիզնեսը․ «Արարատ» սուպերմարկետի նախկին տերը` Մարի անունով, հրաժարվեց անգամ մինչեւ վերջ լսել իր խանութի փակման մասին մեր հարցը։ «Ես շատ վատ վիճակում եմ, չեմ կարող Ձեր հարցերին պատասխանել, գիտեմ՝ ինչ եք հարցնելու, ու չեմ ուզում ոչ մեկի հետ խոսել էդ մասին»,- ասաց նա՝ ըստ էության հաստատելով մեր տեղեկությունները: 

Փորձեցինք կապվել Նարեկ Նալբանդյանի հետ, խնդրել, որ մեկնաբանի գորիսեցիների պատմությունները, հարցնել` արդյոք ճի՞շտ է, որ անձամբ է այցելել Գորիս, «Արարատի» տերերին սպառնացել, թե սուպերմարկետը մինչեւ դեկտեմբեր իրենն է լինելու: Բայց միայն Նարեկ Նալբանդյանի փաստաբանի հետ կարողացանք կապվել, որն ասաց, որ չի կարող մեզ փոխանցել Նարեկ Նալբանդյանի համարը, բայց մեր հարցերն ու նրա մեկնաբանությունը կփոխանցի: Իր կողմից փաստաբան Կարեն Տոնոյանն ասաց. «Նարեկին թեկուզ քիչ ճանաչող մարդը չի հավատա նրան, որ նա կարող է իրեն նման ձեւով պահել»: Նա հայտնեց նաեւ, որ Նարեկ Նալբանդյանի պատասխանը մեզ կտրամադրի մի քանի օրից: Սպասում ենք: