ԱՄՆ-ն չի կարողանա շատ «Tomahawk» հանձնել Կիևին․ FT

ԱՄՆ-ն չի կարողանա Ուկրաինային Tomahawk հրթիռների մեծ խմբաքանակ փոխանցել՝ մատակարարումները հաստատելու դեպքում։ Նման կարծիք է հայտնել ԱՄՆ պաշտպանության նախարարության նախկին պաշտոնյա Ջիմ Թաունսենդը՝ The Financial Times (FT) թերթին։

«Եթե մենք հանձնենք «Tomahawk»-ը, դա մեծ խմբաքանակ չի լինի», - ասել է նա։

Թաունսենդի խոսքերով՝ Պենտագոնում վեճեր են ընթանում մատակարարումների ծավալի շուրջ։ FT-ն նշում է, որ Վաշինգտոնն ավելի արագ է սպառում հրթիռները, քան գնում. 2022 թվականից ի վեր գնվել է 202 Tomahawk հրթիռ, մինչդեռ 2024 թվականից սկսած առնվազն 124 միավոր օգտագործվել է Իրանի և հուսիների դեմ։ Թերթը նաև ենթադրում է, որ ԱՄՆ-ն կարող էր Tomahawk-երն օգտագործել Վենեսուելայի տարածքին հարվածելու համար։

«Նոր ամերիկյան անվտանգության կենտրոն» վերլուծական կենտրոնի պաշտպանական ծրագրի տնօրեն Սթեյսի Փեթիջոնը կարծում է, որ Պենտագոնը կկարողանա Ուկրաինային փոխանցել միայն 20-ից 50 «Tomahawk»։ ԱՄՆ ռազմածովային ուժերի պաշտոնաթող գնդապետ Մարկ Քանսիանը թերթի հետ զրույցում այն կարծիքն է հայտնել, որ ԱՄՆ-ն կկարողանա փոխանցել «հարյուրավոր» հրթիռներ։

Հոկտեմբերի 15-ին ԱՄՆ նախագահ Դոնալդ Թրամփը հայտնել է, որ մտադիր է Վլադիմիր Զելենսկու հետ առաջիկա հանդիպմանը քննարկել ուկրաինական ճգնաժամը։ Լրագրողների այն հարցին, թե արդյոք ԱՄՆ-ն քննարկում է Tomahawk հրթիռներից բացի այլ սպառազինություն Ուկրաինային փոխանցելու հնարավորությունը, Վաշինգտոնի վարչակազմի ղեկավարը հայտարարել է, որ ուսումնասիրում է «այլ տարբերակներ»։