Փաշինյանն իր ելույթում հմտորեն շրջանցեց, թե Եվրոպական միությունը ինչքա՞ն գումար է իրականում արդեն ներդրել Հայաստանում. Աշոտյան

ՀՀԿ փոխնախագահ Արմեն Աշոտյանը իր ֆեյսբուքյան ուղիղ եթերում հայտարարեց, որ ԵՄ-ն Global Gateway 2025 ֆորումի ծրագրի շրջանակներում Հայաստանում իրականացնում է երեք պրոյեկտ, սակայն «Թրամփի ուղու» հետ կապված ոչինչ չկա։

Նշենք, որ նախագծի նպատակն է տարբեր մայրցամաքներում իրականացնել եվրոպական ֆինանսավորմամբ լոգիստիկ ծրագրեր՝ կոմունիկացիոն, ճանապարհային, թվային և էներգետիկ նշանակության։

«Եվրոպական միությունը Հայաստանում Global Gateway ծրագրի շրջանակներում իրականացնում է հետևյալ երեք պրոյեկտները՝ Սիսիան-Քաջարան ճանապարհ, որը լինելու է Հյուսիս-Հարավ միջանցքի մի մասը, 70 կմ երկարությամբ նոր ճանապարհի կառուցում՝ ներառյալ Բարգուշատ թունել և այլն։ Երկրորդ ծրագիրը Սյունիքում լոգիստիկ և մաքսային նոր կենտրոնի կառուցումն է, իսկ երրորդը՝ Երևանում մաքսային և լոգիստիկ կենտրոնի կառուցումը։ Այսինքն՝ Եվրոպական միության ծրագրի շրջանակներում Global Gateway նախագծով իրականացվում են երեք պրոյեկտներ։

«Թրամփի ուղու» հետ կապված որևէ ենթակառուցվածքային կամ ներդրումային հեռանկար Եվրոպական միությունը այս ծրագրով չունի։ Հետևաբար հարց է առաջանում՝ եթե այդ «Թրամփի ուղին» այդքան լավ բան է և այդքան մեծ ֆինանսական, բարգավաճային հեռանկարներ ունի մարդկանց տնտեսության համար, այդքան կարևոր է եվրոպական տնտեսության համար, ոչ թե միայն թուրքալեզու պետությունների, հատկապես Թուրքիայի համար, ապա ինչո՞ւ եվրոպական ներդրումներ այս ուղղությամբ չեն բանակցվել և եվրոպական պաշտոնական ծրագրերի մեջ կա Հյուսիս-Հարավ, բայց չկա «Թրամփի ուղու» հետ կապված որևէ ներդրումային խոստում»,– նշեց ՀՀԿ փոխնախագահը։

Անդրադառնալով Բրյուսելում Փաշինյանի ելույթին՝ Աշոտյանը նշեց, որ վերջինս իր ելույթում հմտորեն շրջանցել է այն փաստը, թե Եվրոպական միությունը ինչքա՞ն գումար է իրականում արդեն ներդրել Հայաստանում։

«Նիկոլ Փաշինյանն իր ելույթում հմտորեն շրջանցեց այդ փաստը, որ եվրոպական ծրագրերը Հայաստանում Global Gateway նախագծի շրջանակներում իրականացվում են առանձին՝ «Թրամփի ուղու» վաշինգտոնյան ձեռքբերումներից։ Նա նաև խուսափեց խոսել, թե Եվրոպական միությունը ինչքա՞ն գումար է իրականում արդեն ներդրել Հայաստանում։ Ես հավաստիացնում եմ, որ այդ ծրագրերը թերի կատարվում են, ինչպես ամեն ինչ, ինչ կապված է Նիկոլ Փաշինյանի կառավարության հետ»,– ասաց Աշոտյանը։