Մակրոնները 3,6 միլիոն եվրոյով վաճառել են ֆրանսիական հանգստավայրի իրենց ընտանեկան առանձնատունը. BFM TV

Ֆրանսիայի Լե Տուկե հանգստավայրում Ֆրանսիայի նախագահ Էմանուել Մակրոնի ընտանիքը շատ շահավետ անշարժ գույքի գործարք է կնքել, գրում է BFM TV-ն։

Monéjan առանձնատունը, որը Բրիջիտ Մակրոնին է պատկանում 1985 թվականից, վաճառվել է 3,6 միլիոն եվրոյով։ Մոտ 250 քառակուսի մետր մակերեսով և 660 քառակուսի մետր հողամասով տունը հանգստավայրի հեղինակավոր հատվածում է՝ այսպես կոչված «ոսկե եռանկյունում»։

Այդ վաճառքը հսկայական շահույթ է բերել. դեռևս 2014 թվականին գույքը մոտ 1,2 միլիոն եվրո էր գնահատվել։

Հարկային մարմիններն այնուհետև գումարը մեծացրել են, հասցնելով 1,4 միլիոն եվրոյի, այդ պատճառով Էմանուել Մակրոնը ստիպված է եղել գույքահարկ (ISF) վճարել: Սակայն ընդամենը տասը տարի անց գինն աճել է ավելի քան 200%-ով։

Վիլլայի յուրօրինակ առանձնահատկությունն այն է, որ առաջին հարկում կան առևտրային տարածքներ՝ անշարժ գույքի գործակալություն և հագուստի խանութ, որոնք վարձակալության եկամուտ են ապահովում: Դա, ինչպես նաև սեփականատերերի հեղինակավոր պատմությունը, մեծացնում էին գույքի գրավչությունը։

Գնորդը 76-ամյա կառուցապատող Պատրիկ Պավլետտան էր Արրասից, Oxial ընկերության սեփականատերը: Միևնույն ժամանակ, Մակրոնները չէին հրաժարվում Լե Տուկեում ապրելուց. գրեթե միաժամանակ նրանք ձեռք բերեցին մեկ այլ վիլլա նույն քաղաքում, ծովին ավելի մոտ: Գործարքը ձևակերպվել է հատուկ կառույցի՝ Société Civile Immobilière (SCI) միջոցով, որը ներառում է Էմանուելին, Բրիջիտին և Բրիջիտի՝ առաջին ամուսնությունից երեխաներին։

Քանի որ տունն ընտանիքի սեփականությունն է 1985 թվականից, վաճառքն ազատված է կապիտալ եկամտահարկից: Այսպիսով, Մակրոնները կարողացել են ոչ միայն շահավետորեն վաճառել հին վիլլան, այլև իրենց ապահովել նոր բնակարանով հեղինակավոր տարածքում՝ նվազագույնի հասցնելով հարկային ծախսերը: