Ինչով է պայմանավորված Վրաստանի տարածքով հայկական կոնյակի տարանցման դժվարությունը

Իշխանության եկող յուրաքանչյուր քաղաքական ուժ իր հետ բերում է լոգիստիկայի և բեռնափոխադրումների նոր կանոններ, որոնք բաղկացած են օրինական (պաշտոնական) և անօրինական (ոչ պաշտոնական) մասերից։ Երկու հատվածներն էլ կարող են փոփոխվել՝ կախված կառավարության քաղաքականությունից։ Այս մասին NEWS.am-ի թղթակցի հետ հարցազրույցում ասել է Գինու ազգային կենտրոնի նախագահ Ավագ Հարությունյանը։

«Այդպես եղավ Սահակաշվիլիի իշխանության գալով։ Նախքան Սահակաշվիլին հայ-ռուսական հարաբերությունները լոգիստիկայի առումով մեկ բնույթ ունեին, իսկ Սահակաշվիլիի իշխանության գալով հետո դրանք սկսեցին այլ բնույթ կրել։

Այնուհետև իշխանության եկավ «Վրացական երազանք» կուսակցությունը։ Մինչև Իվանիշվիլիի իշխանության գալը հայ-ռուսական հարաբերությունները լոգիստիկայի առումով մի բան էին, իսկ Իվանիշվիլիի իշխանության գալուց հետո դրանք ուրիշ դարձան։ Իրավիճակը կտրուկ փոխվում է, և նոր կանոններ սահմանելու համար ժամանակ է պահանջվում՝ թե՛ պաշտոնական, թե՛ ոչ պաշտոնական մասերում։

Այս անցումային շրջանում որոշակի հանցավոր խմբավորումներ փորձում են գումար վաստակել և քաղաքական դիվիդենտներ շահել։ Մենք գործ ունենք այդ դասական սխեմայի հետ։ Վրացական ղեկավարության կուրսը Ռուսաստանի նկատմամբ փոխվել է, նրա կուրսը Եվրոպայի նկատմամբ փոխվել է, և քաղաքական մոտեցումներն էլ են փոխվել», - նշել է փորձագետը։

Նա պարզաբանեց, որ տարածաշրջանի բոլոր երկրները հստակ ազդանշաններ են ուղարկում Հայաստանին։

«Ադրբեջանն ասում է. «Ես ոչնչացնելու եմ քո կոնյակը, քո գինին և քեզ առհասարակ, նույնիսկ եթե ինձ հետ հազարավոր խաղաղության համաձայնագրեր կնքես»։

Վրաստանն ասում է, որ ինքը տարանցիկ երկիր է և այս շրջանակում կանի ուժերի ներածին չափով ամեն ինչ՝ անկախ նրանից, թե ինչպես դա կանդրադառնա Հայաստանի վրա։

Ռուսաստանն էլ հայտարարում է. «Ես ստեղծում եմ իմ սեփական կոնյակի բազան, այնպես որ 5-10 տարի հետո ես հայկական կոնյակի կարիք չեմ ունենա»։

Թուրքիան էլ ասում է, որ թույլ չի տա հայկական ապրանքներին անցնել իր տարածքով»,- եզրափակել է Հարությունյանը։