Ադրբեջանին հաջողվեց ստեղծել միջազգային կոնսենսուս այսպես կոչված «Զանգեզուրի միջանցքի» շուրջ․ Սերգեյ Մելքոնյան

Նախեւառաջ մենք պիտի արձանագրենք, որ Ադրբեջանին հաջողվեց ստեղծել միջազգային կոնսենսուս այսպես կոչված «Զանգեզուրի միջանցքի» շուրջ։ Այս մասին NEWS.am-ի հետ զրույցում հայտնեց «Ապրի, Արմենիա» վերլուծական կենտրոնի գիտաշխատող, արեւելագետ Սերգեյ Մելքոնյանը։

«Հիմա չեն խոսում «Խաղաղության խաչմերուկի» մասին։ Հիմա խոսում են միայն այսպես կոչված «Զանգեզուրի միջանցքի» մասին։ Եւ կոնսենսուսը հետեւյալն է․ այս ճանապարհը պիտի բացվի։ Եւ հիմա փորձում են գտնել շահագրգռված կողմերին, որոնք կդառնան այս մեծ ծրագրի մաս», - նշեց արեւալգետը։

Նրա խոսքով՝ բուն այսպես կոչված նախագծի հետ որեւէ խնդիր չկա։ Բոլորը համաձայն են, որ այն բացվի։

Ադրբեջանի երկրորդ հաջողությունը, ըստ Սերգեյ Մելքոնյանի, այն է, որ խոսքը չի գնում այլ կոմունիկացիաների ապաշրջափակման մասին։ «Միայն քննարկում են հենց այս հարավային ճանապարհը, այսպես կոչված «միջանցքը»։

Եւ Ադրբեջանը որեւէ պարտականություն չի վերցնում տրամադրել Հայաստանին ճանապարհ Երեւանից Նախիջեւանով դեպի Իրան։ Խոսքը գնում է միայն այն ճանապարհի մասին, որը նախընտրում են Թուրքիան եւ Ադրբեջանը։

Մենք հավելյալ բաց մանրամասներ չունենք, բայց հաշվի առնելով այն, որ տարբեր տեղերից ինչ-որ հայտարարություններ են հնչում, դա նշանակում է, որ բանակցությունները դեռ չեն ավարտվել եւ կան տարբեր օպցիաներ, որոնք կողմերը քննարկում են», - ասաց փորձագետը։

Նա շեշտեց, որ ՀՀ վարչապետ Նիկոլ Փաշինյանի վերջին այցերը Եվրոպա, հայտարարությունները Ամերիկայի կողմից, արտահոսքները մամուլում եւ փորձագետների կողմից վկայում են, որ «դեռ կա մանյովրի հնարավորություն»։

«Բայց դա նշանակում է նաեւ, որ մենք մոտենում ենք հնարավոր ավարտին, որ այսպես կոչված միջանցքը կբացվի եւ արդեն կարեւոր կլինի ընտրել, որ կողմի հետ համագործակցել այս կոնտեքստում», - ասաց Սերգեյ Մելքոնյանը։

NEWS.am