Որքան Նիկոլ Փաշինյանի վրա ճնշումը մեծանա, այնքան գործողությունները կոշտ են լինելու․ ընդդիմադիրները պետք է պատրաստ լինեն․ Հակոբ Հակոբյան

Արդեն տևական ժամանակ է՝ Նիկոլ Փաշինյանը և իր իշխանությունը նույն սկզբունքով ու ձեռագրով են հանդես գալիս, ցանկացած մարդու շուրջ, որ նույիսկ տեսականորեն հնարավորություն կա այլակարծություն դրսևորել, փորձում են միանգամից վախի և ճնշման մթնոլորտ ստեղծել։ Այս մասին «Փաստինֆո»
-ի հետ զրույցում ասաց Արցախի «Արդարություն» կուսակցության նախագահ Հակոբ Հակոբյանն՝ անդրադառնալով նախօրեին մի շարք ընդդիմադիրների, այդ թվում՝ իր ղեկավարած կուսակցության անդամ, Արցախի ԱԺ պատգամավոր Դավիթ Գալստյանին քննչական հրավիրելուն։

 Հակոբյանն ընդգծեց, որ երեկ Գալստյանին հրավիրել են, այսպես կոչված՝ զրույցի, ինչպես իրենք էին որակել, մեծ հաշվով բովանդակային առումով որևիցե էական նշանակություն չունեցող զրույց է եղել։ «Սակայն կարծում եմ, որ այդ մարդկանց այնքան բովանդակությունը չէր հետաքրքրում, որքան հենց փաստը, երևույթը, այդպես փորձում են մարդկանց մեջ վախ սերմանել, փորձում են այդ մարդկանց հետ պահել սեփական կարծիքը արտահայտելու ցանկությունից։ Շատ բնական է, որ իշխանությունը, որի միակ նպատակը այս երկրում սեփական իշխանությունը պահպանելն է, նման վարքագիծ է դրսևորում, զարմանալի կամ որևէ նոր բան չկա։ Եթե որևէ մեկին կարող են երկու ամսով կալանքի տանել մեկ նախադասության համար, ապա կարծում եմ ամեն ինչի էլ ընդունակ են»,-ասաց Հակոբյանը։

Նա ընդգծեց, որ որքան Նիկոլ Փաշինյանի վրա ներքաղաքական կյանքում ճնշումը մեծանա, այնքան նա ավելի կոշտ գործողությունների է դիմելու։ «Նրա նպատակը մեկն է՝ իշխանությունը պահպանելը, և, կարծում եմ, որ ընդդիմադիր դաշտի բոլոր գործիչները պետք է պատրաստ լինեն այսպիսի երևույթների, և իրավապահների այս գործողությունները որևէ կերպ չպետք է ազդեն նրանց պլանավորած միջոցառումների վրա, այլ հակառակը՝ պետք է ցույց տալ, որ նման գործողություններով չեն կարող որևէ բան փոխել»։

Անդրադառնալով արցախցիներին, մասնավորապես Արցախի պատգամավորներին՝ նա ընդգծեց, որ ինչպես նրանք, այնպես էլ իրենց հայրենիքից բռնի տեղահանված 120 հազար արցախցիներ իրենց վախը թողել են Արցախում՝ իկորցրած գերեզմանների, տների հետ։
«Ես չեմ կարծում, որ նման գործողություններով նրանք կկարողանան արցախցիներին ինչ-որ կերպ հետ պահել իրենց մտադրություններից, իսկ արցախցիների միակ մտադրությունը հայրենիք հետ վերադառնալն է, այդ ճանապարհին նրանք պատրաստ են պայքարելու», - եզրափակեց գործիչը։