«Հրապարակ». Մասնագետները հիմնավոր կասկածներ ունեն, որ եկեղեցու դեմ արշավը Թուրքայի նախապայմաններից մեկն է

Թուրքագետ, պատմական գիտությունների դոկտոր Ռուբեն Մելքոնյանը Նիկոլ Փաշինյանի վաղվա այցը Թուրքիա համարում է «աննախադեպ, բայց բացասական իմաստով»:

Նա կարծում է, որ Նիկոլ Փաշինյանի վերջին արշավը Հայաստանյայց առաքելական եկեղեցու դեմ թուրք-ադրբեջանական պահանջների շրջանակներում է իրականացվում. «Հայ առաքելական եկեղեցու հանդեպ ճնշումները ևս կարող ենք այս համատեքստում դիտարկել: Ամեն գնով փորձում են Հայ առաքելական եկեղեցին թուլացնել` ինչո՞ւ, որովհետև թուրքական արտաքին քաղաքական հայեցակարգերում, տեսություններում, թուրք դիվանագետների վերլուծություններում և այլն, Հայոց եկեղեցին դիտարկվում է որպես մեծ խոչընդոտ: Այն համահայկական մեծ ցանց է, որը պայքարում է Հայոց Ցեղասպանության ճանաչման, արցախցիների իրավունքների և հայկական մշակութային ժառանգության համար: Եկեղեցու հանդեպ այս «հանկարծակի» արշավը հենց այդ նպատակով է սկսվել: Նիկոլ Փաշինյանին` յոթուկես տարի իշխանավարումից հետո նոր միայն սկսեց հետաքրքրել կուսակրոնության հարցը, ինչից հետո սկսեց շանտաժի ենթարկել եկեղեցականներին: Նիկոլ Փաշինյանը` որպես քաղաքացի, որպես վարչապետ, որպես եկեղեցու հետևորդ, չունի որևէ իրավունք միջամտելու նման հարցերի մեջ: Եւ այժմ Թուրքիա մեկնելն` այս շրջանում համարել պատահականություն, գոնե մասնագետների շրջանում անհնար է: Ունենք հիմնավոր կասկածներ, որ Հայ առաքելական եկեղեցու դեմ արշավը Թուրքիայի նախապայմաններից մեկն է»:

 «Հրապարակ օրաթերթ»