Դատապարտում ենք Փաշինյանի՝ Եկեղեցու դեմ հակազգային քաղաքականությունը․ հայտարարություն
Սկանդինավիայի հայերի միությունը խստորեն դատապարտում է Նիկոլ Փաշինյանի՝ Հայ Առաքելական Եկեղեցու դեմ հակազգային և հակաժողովրդական քաղաքականությունը։
Ասված է միության հայտարարության մեջ․
«Վերջին օրերին Նիկոլ Փաշինյանը բացահայտ թշնամական քարոզարշավ է սկսել Հայ Առաքելական Եկեղեցու նրա մշակությային ժառանգության և հոգևորականների նկատմամբ՝ օգտագործելով գարշելի ու փողոցային բառապաշար։ Բացի Եկեղեցուն վարկաբեկելուց, վարչապետի պաշտոնը զբաղեցնողը, խախտելով ՀՀ Սահմանադրությունը՝ անօրինական կոչերով փորձել է միջամտել Եկեղեցու ներքին գործերին։
Այս վարչակարգի հարձակումը մեր 1700-ամյա հոգևոր հաստատության և նրա սպասավորների դեմ, ոչ այլ ինչ է քան հայ ժողովրդի ինքնության, ազգային արժեքների դեմ ուղղված հարված ու հայ ժողովրդին բաժանելու ու եկեղեցու շուրջ միասնությունն ու հոգևոր հիմքերը խաթարելու հնարք: Հայ Առաքելական Եկեղեցին դարեր շարունակ եղել է հայ ժողովրդի հոգևոր կենտրոնը, հավատի, ազգային միասնության ու մշակութային ժառանգության պահապանը։
Այն ոչ միայն հոգևոր հաստատություն է, այլև մեր հայրենիքի, պատմության, ավանդույթների ու ազգային ինքնագիտակցության անբաժանելի մասը։ Հայ Առաքելական եկեղեցին դարեր շարունակ եղել է պետության հանձնառույթն իրականացնողը և այսօր էլ, հայ ժողովրդի ու Հայաստանի համար ճգնաժամային պայմաններում, շարունակում է հայ ինքնության ազգային շահերի պաշտպանությունը՝ հակազդելով ներկայիս իշխանությանը։ Ավելին՝ ՀԱԵ-ն Հայաստանում ամենաբարձր վստահություն ու վարկանիշ վայելող հաստատությունն է։ Այս ամենն ակնհայտորեն ցայտնոտի մեջ է գցում հայ ժողովրդի կողմից մերժված իշխանությանը։
Փաստ է նաև այն, որ Եկեղեցու դեմ այս հարձակումները ողջունվում են Հայաստանի թշնամի պետությունների կողմից։ Սկանդինավիայի Հայերի Միությունը խստորեն դատապարտում է Նիկոլ Փաշինյանի՝ Հայ Առաքելական Եկեղեցու դեմ այս հակազգային և հակաժողովրդական քաղաքականությունը։ Հայ Առաքելական Եկեղեցու և նրա հոգեւոր դասի դեմ Փաշինյանի ատելության քարոզը, հայ ինքնության ու արժեքների նվաստացումն անընդունելի են և միայն հաստատում են, որ այս իշխանությունը լծված է հայ ազգային արժեհամակարգը տարրալուծելու և Ադրբեջանին ու Թուրքիային հաճոյանալու ամոթալի գործին։ Մենք կոչ ենք անում ազգային ուժերին, հայությանը և արտերկրի հայ ժողովրդի բարեկամներին՝ համախմբվել Հայ Առաքելական Եկեղեցու շուրջ և միասնաբար պաշտպանել մեր սրբությունները՝ հավատքը ազգային արժեքներն ու հայրենիքը»։
Հետևեք մեզ Viber-ում
