Մխչյանի դպրոցում սկանդալից հետո քննարկվում է տնօրենի հեռացման հարցը. մարզպետարան

Արարատի մարզի Մխչյան գյուղի դպրոցում թմրամիջոցների հետ կապված սկանդալից հետո քննարկվում է տնօրենի հեռացման հարցը:

Այս մասին լրատվամիջոցների հետ զրույցում հայտնել է Արարատի մարզպետարանի Կրթության, մշակույթի և սպորտի վարչության պետ Մարտուն Մանուկյանը: 

Վերջինս, անդրադառնալով տեղեկություններին, թե դպրոցում տեղի ունեցածը ամիսների վաղեմություն ունի և շարունակվում է արդեն 4 ամիս, պաշտոնյան նշել է, որ դա կպարզվի ոստիկանության կողմից, քննության ընթացքում, իսկ մարզպետարանի հանրակրթության վարչության հիմնական նպատակը դպրոցում դասապրոցեսի նորմալ կազմակերպումն է:

«Այն դետալային հարցերը, որոնք կարող են անհամադրելի լինել կրթական գործընթացի հետ, միանշանակ խիստ միջոցների են հանդիպելու թե՛ տնօրինության, թե՛ մյուսների հանդեպ: Իր աշխատանքի մեջ ինչ-որ մեկը թերացել է, թե՝ ոչ, կարճ ժամանակում կպարզվի և կտեղեկանաք, կարող է քննարկվել նաև տնօրենի հեռացման հարցը»,- նշել է Մանուկյանը:

Նա հավելել է, որ ծնողները մտահոգություն ունեն երեխաների անվտանգության հարցերի վերաբերյալ, մարզպետարանում հանդիպմանն են մասնակցել տուժած երեխաների ծնողները ևս, քննարկում են ունեցել:

Ավելի վաղ ԶԼՄ-ներում լուրեր էին տարածվել, որ օրեր առաջ դպրոցում տեղի է ունեցել սարսափելի միջադեպ։

Ըստ տեղեկությունների՝ բարձր դասարանների մի քանի տղաներ դպրոցի զուգարանում կապկպել են 4-րդ դասարանի երկու աշակերտի և ստիպողաբար թմրանյութ տվել, որից հետո երեխաների մոտ կախվածություն է առաջացել, նրանք սկսել են տնից գումար գողանալ կրկին նույն աշակերտներից թմրանյութ գնելու նպատակով։

Արարատի մարզպետի աշխատակազմը հայտարարություն է տարածել՝ նշելով, որ խորապես մտահոգված են դպրոցում տեղի ունեցած միջադեպով։

Խստորեն դատապարտելով կրթական հաստատությունում արձանագրված անթույլատրելի երևույթը՝ ընդգծվել է, որ դեպքը կմնա մշտական վերահսկողության ներքո, կարվի հնարավորը՝ կանխելու նման իրավիճակների կրկնությունը:

Արարատի մարզի Մխչյան գյուղի Քրիստափոր Ալավերդյանի անվան դպրոցում տեղի ունեցած դեպքով նախաձեռնվել է քրեական վարույթ:

4 անձի նկատմամբ հարուցվել է հանրային քրեական հետապնդում, 1 անձի վերաբերյալ կա ձերբակալման որոշում:

Մխչյանի դպրոցում տեղի ունեցածը «սարսափելի» է որակել ԿԳՄՍ նախարարը և նշել՝ կհեռացվեն բոլոր անձինք, որոնք տեղյակ են եղել: